पणजी: एफसी गोवाने सुपर कप राखण्याच्या दिशेने महत्त्वपूर्ण पाऊल टाकताना रविवारी रात्री भर पावसात गतउपविजेत्या जमशेदपूर एफसीला २-० फरकाने नमविले. ‘ब’ गटातील अन्य लढतीत इंटर काशी एफसीने बलाढ्य नॉर्थईस्ट युनायटेडला पिछाडीवरून २-२ असे गोलबरोबरीत रोखले.

फातोर्डा येथील पंडित जवाहरलाल नेहरू स्टेडियमवर एफसी गोवासाठी हावियर सिव्हेरियो याने पहिला गोल केला. स्पॅनिश खेळाडूने गतमोसमात खेळलेल्या संघाविरुद्ध ४५व्या मिनिटास भेदक हेडिंगवर गोल केला. डेव्हिड तिमोरचा हेडर क्रॉसबारला आपटल्यानंतर रिबाऊंडवर सर्बियन देयान द्राझिच याने एफसी गोवास ६६व्या मिनिटास २-० अशी भक्कम आघाडी मिळवून दिली. विजयामुळे एफसी गोवाच्या खाती तीन गुण जमा झाले.

बांबोळी येथील ॲथलेटिक्स स्टेडियमवर रविवारी संध्याकाळी इंटर काशीने बलाढ्य नॉर्थईस्ट युनायटेडला चकीत केले. हरमनप्रीत सिंग याने पाचव्याच मिनिटास गोल केल्यामुळे आय-लीग विजेत्यांना आघाडी मिळाली. मोरोक्कन अलाएद्दीन अजारेई याने १८व्या मिनिटास दोन वेळच्या ड्युरँड कप विजेत्या नॉर्थईस्ट युनायटेडला बरोबरी साधून दिली.

४०व्या मिनिटास स्पॅनिश मिगेल झाबाको याने हेडिंगवर केलेल्या गोलमुळे गुवाहाटीस्थित संघ विश्रांतीला २-१ असा आघाडीवर होता. ७४व्या मिनिटास कार्तिक पानिकर याच्या गोलमुळे इंटर काशीने बरोबरी साधली. दोन्ही संघांना प्रत्येकी एक गुण विभागून मिळाला. ब गटातील पुढील लढतीत २९ रोजी जमशेदपूर एफसी व नॉर्थईस्ट युनायटेड यांच्यात, तर एफसी गोवा व इंटर काशी एफसी यांच्यात लढत होईल.

पावसामुळे उत्तरार्ध लांबला

जोरदार पावसामुळे फातोर्डा येथे एफसी गोवा आणि जमशेदपूर एफसी यांच्यातील सामन्यात उत्तरार्ध सुरू होण्यास २४ मिनिटे उशीर झाला. पावसाची संततधार सुरू असताना सामन्यास सुरवात झाली, मैदानावर भरपूर पाणी साचल्यामुळे चेंडूवर ताबा राखताना दोन्ही संघांतील खेळाडूंना त्रास झाला.