पणजी: महिला कसोटी क्रिकेट खेळलेली एकमेव गोमंतकीय शिखा पांडे हिने नुकत्याच संपलेल्या महिला प्रीमियर लीग (डब्ल्यूपीएल) स्पर्धेत धारदार मारा केला. सलग तिसऱ्या वर्षी तिने दिल्ली कॅपिटल्ससाठी गोलंदाजीची धुरा वाहताना यंदा अकरा गडी बाद करून छाप पाडली.

दिल्ली कॅपिटल्स (डीसी) संघाला स्पर्धेत उपविजेतेपद मिळाले. मुंबईतील ब्रेबॉर्न स्टेडियमवर रविवारी झालेल्या अंतिम लढतीत दिल्ली संघाला मुंबई इंडियन्सकडून आठ धावांनी पराभव पत्करावा लागला. दिल्ली कॅपिटल्सच्या स्पर्धेतील सर्व नऊही सामन्यांत शिखा खेळली. तिने ७.०८च्या इकॉनॉमी रेटने गडी बाद केले. एकंदरीत तीन डब्ल्यूपीएल स्पर्धांत तिने ३० गडी बाद केले आहेत. दिल्लीतर्फे यावेळच्या स्पर्धेत ऑस्ट्रेलियन फिरकी गोलंदाज जेस जोनासेन हिने १३, तर शिखाने ११ गडी बाद केले.

शिखा सध्या भारतीय सीनियर महिला संघाची सदस्य नसली, तरी देशांतर्गत क्रिकेटमध्ये सक्रिय आहे. वयाच्या ३५ व्या वर्षीही तिच्या गोलंदाजीतील भेदकता कायम असल्याचे यावेळच्या ‘डब्ल्यूपीएल’ स्पर्धेतील कामगिरीने सिद्ध झाले. ‘‘डीसी रंगात (जर्सीत) पुन्हा खेळताना खूप छान वाटते,’’ असे मनोगत शिखाने यावेळची ‘डब्ल्यूपीएल’ स्पर्धा सुरू होण्यापूर्वी आपल्या सोशल मीडिया अकाऊंटवर व्यक्त केले होते.

परदेशातील लीगमध्येही छाप

शिखाने भारतातील‘डब्ल्यूपीएल’ स्पर्धेव्यतिरिक्त ऑस्ट्रेलियातील वूमन्स बिग बॅश लीगमध्ये (डब्ल्यूबीबीएल) ब्रिस्बेन हिट संघाचे, तर वेस्ट इंडीजमधील वूमन्स कॅरिबियन प्रीमियर लीगमध्ये (डब्ल्यूसीपीएल) त्रिनबागो नाईट रायडर्स संघाचे प्रतिनिधित्व केले. २०२४-२५ मोसमात तिने वूमन्स बिग बॅश लीगमधील १२ सामन्यांत १२ विकेट, तर कॅरिबियन लीगमधील पाच सामन्यांत चार गडी बाद केले होते.

डब्ल्यूपीएल स्पर्धेतील शिखाची गोलंदाजी

वर्ष सामने डाव विकेट सर्वोत्तम इकॉनॉमी

२०२३ ९ ९ १० ३-२३ ६.५९

२०२४ ९ ९ ९ २-२३ ७.१७

२०२५ ९ ९ ११ २-१४ ७.०८

एकूण २७ २७ ३० ३-२३ ६.९६