पणजी: शंतनू नेवगी याने प्रेक्षणीय शतक नोंदवून कर्नल सी. के. नायडू करंडक २३ वर्षांखालील क्रिकेट सामन्यात गोव्याला जम्मू-काश्मीरविरुद्ध सावरले. त्याच्या १०४ धावांच्या खेळीमुळे संघाला पहिल्या दिवशी २८६ धावा करता आल्या.

जम्मू येथील हॉस्टेल मैदानावर शुक्रवारपासून एलिट अ गटातील चार दिवसीय सामन्याला सुरवात झाली. सामन्याच्या पहिल्या दिवसअखेर यजमान संघाने दोन षटकांत बिनबाद १० धावा केल्या होत्या. गोव्याच्या पहिल्या डावात शंतनूने निवड सार्थ ठरविली. यंदा १९ वर्षांखालील वयोगटात लक्षवेधक ठरलेल्या या युवा फलंदाजाने वरच्या वयोगटात शतकाचा मान मिळविताना १३१ चेंडूंतील खेळीत १८ चौकार लगावले.

त्यामुळे नाणेफेक जिंकून प्रथम फलंदाजी करताना गोव्याला पावणेतीनशे धावांचा टप्पा ओलांडता आला. शंतनूने वैयक्तिक शतकी खेळीत दोन अर्धशतकी भागीदारीही नोंदविल्या. दुसऱ्या विकेटसाठी त्याने आदित्य कोटा (२०) याच्यासमवेत ५६ धावांची भागीदारी केली, नंतर शंतनूने पाचव्या विकेटसाठी जीवनकुमार चित्तेम (४७, ७९ चेंडू, ६ चौकार, १ षटकार) याच्यासमवेत ६५ धावांची भागीदारी केली.

दिशांक मिस्कीन ४९ धावांवर नाबाद राहिला. त्याने संयमी खेळीत १०८ चेंडूंचा सामना करताना सात चौकार मारले. त्याच्या चिवट फलंदाजीमुळे गोव्याला धावसंख्या वाढविणे शक्य झाले. जम्मू-काश्मीरतर्फे विशाल कुमार याने ९० धावांत ६ गडी बाद केले.

संक्षिप्त धावफलक

गोवा, पहिला डाव ः ८५.५ षटकांत सर्वबाद २८६ (आदित्य कोटा २०, सार्थक भिके ०, शंतनू नेवगी १०४, यश कसवणकर ५, कौशल हट्टंगडी २२, जीवनकुमार चित्तेम ४७, दिशांक मिस्कीन नाबाद ४९, अनुज यादव ३, मनीष काकोडे ३, समर्थ राणे ११, सुजय नाईक ४, विशाल कुमार २८.५-७-९०-६, सर्वाशिष सिंग २९-०-६३-३).

जम्मू-काश्मीर, पहिला डाव २ षटकांत बिनबाद १०.