पणजी: गोव्याची प्रतिभाशाली युवा जलतरणपटू पूर्वी नाईक हिने राष्ट्रीय सबज्युनियर-ज्युनियर जलतरण स्पर्धेतील शानदार कामगिरीची मालिका कायम राखताना गुरुवारी सलग दुसरे रौप्य, तर एकंदरीत तिसरे पदक जिंकले. स्पर्धा ओडिशातील भुवनेश्वर येथे सुरू आहे.

पूर्वी हिने गुरुवारी मुलींच्या गट तीनमधील ४०० मीटर फ्रीस्टाईल शर्यतीत ५ मिनिटे ०४.२२ सेकंद वेळेसह रौप्यपदकाची कमाई केली. हरियानाची सेरेना सरोहा (५ मिनिटे ५७.७० सेकंद) हिने सुवर्णपदक, तर कर्नाटकच्या स्तुती सिंग (५ मिनिटे ०४.२९ सेकंद) हिने ब्राँझपदक मिळविले.

पूर्वी हिने स्पर्धेत बुधवारी १०० मीटर फ्रीस्टाईलमध्ये (१ मिनिट ०७.२३ सेकंद) रौप्यपदक, तर स्पर्धेच्या पहिल्या दिवशी मंगळवारी २०० मीटर फ्रीस्टाईल (२ मिनिटे ३०.६२ सेकंद) शर्यतीत ब्राँझपदक प्राप्त केले होते.

पूर्वी नाईक कांपाल-पणजी येथील खेलो इंडिया राज्य उत्कृष्टता केंद्रातील जलतरण प्रशिक्षणार्थी आहे. तिला प्रशिक्षक टी. ए. सुजित यांचे मार्गदर्शन लाभते. मूळ हरवळे-साखळी येथील ही जलतरणपटू कुजिरा येथील मुष्टिफंड हायस्कूलची विद्यार्थिनी आहे.