पणजी: गोव्याच्या २३ वर्षांखालील क्रिकेट संघाने एकदिवसीय स्पर्धेत मंगळवारी अतिशय खराब फलंदाजी केली. त्यांच्यावर अवघ्या ६० धावांत गारद होण्याची वेळ आली. छत्तीसगडमधील भिलाई येथे ड गट सामन्यात मध्य प्रदेशने आठ विकेट राखून विजय नोंदविताना आवश्यक धावा ७.३ षटकात गाठल्या.

सामन्यात गोव्याने (Goa) नाणेफेक जिंकून प्रथम फलंदाजी स्वीकारली; परंतु हा निर्णय त्यांच्या अंगलट आला आणि डाव १९व्या षटकात संपुष्टात आला. गोव्याची ही २३ वर्षांखालील वयोगटातील अतिशय निराशाजनक फलंदाजी ठरली. डावातील अकराव्या षटकात ६ बाद ३९ धावा अशी दयनीय स्थिती झालेल्या गोव्याला नंतर सावरताच आले नाही. पहिल्या सामन्यात झारखंडविरुद्ध (Jharkhand) १२९ धावांनी पराभूत झालेल्या गोव्याला मंगळवारी सलग दुसऱ्या पराभवाचा सामोरे जावे लागले.

संघाच्या निराशाजनक फलंदाजीत फक्त दोघाच फलंदाजांना दुहेरी धावसंख्या गाठता आली. कर्णधार शिवेंद्र भुजबळ याने १९, तर कौशल हट्टंगडी याने १३ धावा केल्या. प्रत्युत्तरदाखल मध्य प्रदेशची २ बाद ११ अशी घसरगुंडी उडाली होती. मात्र, त्यांच्या चंचल राठोड आणि अनिकेत वर्मा यांनी नंतर आक्रमक फलंदाजी करत संघाला आठव्या षटकातच विजय मिळवून दिला.

संक्षिप्त धावफलक : गोवा १९ षटकांत सर्वबाद ६० (कौशल हट्टंगडी १३, शिवेंद्र भुजबळ १९, रामवीरसिंग गुर्जर ५-२१, अधीर प्रताप सिंग २-११, सौम्यकुमार पांडे ३-६) पराभूत वि. मध्य प्रदेश ७.३ षटकांत २ बाद ६६ (चंचल राठोड नाबाद २३, अनिकेत वर्मा नाबाद ३२, मनीष काकोडे ४-०-३९-१, शिवम प्रताप सिंग ३.३-०-२७-१).