Joe Root Test Century: इंग्लंडच्या महान खेळाडूंपैकी एक असलेल्या जो रुटने आणखी एक कसोटी शतक झळकावले. लॉर्ड्स कसोटीच्या पहिल्या दिवशी रुटची शतक ठोकण्याची संधी हुकली होती. तो पहिल्या दिवशी 99 धावांवर पॅव्हेलियनमध्ये नाबाद परतला. शेवटच्या षटकात रवींद्र जडेजाने त्याला एक नाही तर दोन धावा घेऊन शतक पूर्ण करण्याची संधी दिली होती, परंतु त्यानंतरही तो 99 धावांवर नाबाद परतला. यानंतर दुसऱ्या दिवशी सामना सुरु झाला तेव्हा पहिल्या चेंडूपासूनच सर्वांना वाटत होते की, रुट त्याचे शतक कधी पूर्ण करेल. त्यानेही जास्त विलंब न करता एक धाव काढत आपले शतक पूर्ण केले.

रुटने शानदार शतक झळकावले

दरम्यान, या शतकासह रुटने अनेक खेळाडूंना मागे सोडले. जर फक्त त्याच्या कसोटी क्रिकेटबद्दल बोलायचे झाल्यास, हे रुटचे 37 वे शतक आहे. राहुल द्रविड आणि ऑस्ट्रेलियाचा स्टीव्ह स्मिथ यांनी कसोटी क्रिकेटमध्ये 36 शतके झळकावली आहेत. आतापर्यंत ते रुटच्या बरोबरीने होते, परंतु आता रुट त्यांच्या पुढे गेला. तसेच, रुटच्या आंतरराष्ट्रीय क्रिकेटबद्दल बोलायचे झाल्यास तिथेही त्याने महेला जयवर्धनेला मागे सोडले.

रुटने महेलाला मागे टाकत हाशिम अमलाशी बरोबरी केली

कसोटी, एकदिवसीय आणि टी-20 मिळून रुटचे हे 55वे आंतरराष्ट्रीय शतक आहे. यामध्ये सचिन तेंडुलकर 100 शतके झळकावून पहिल्या क्रमांकावर आहे. श्रीलंकेचा महेला जयवर्धनेने आंतरराष्ट्रीय क्रिकेटमध्ये 54 शतके झळकावली आहेत, तो आता रुटच्या मागे आहे. हाशिम अमलाने आंतरराष्ट्रीय क्रिकेटमध्ये 55 शतके झळकावली आहेत. रुटने आता त्याच्याशी बरोबरी केली.

जो रुट कसोटी क्रिकेटमधील स्टार

जो रुटने (Joe Root) आतापर्यंत 156 कसोटी सामन्यांमध्ये 13 हजारांहून अधिक धावा केल्या आहेत. सचिन तेंडुलकर सध्या 15,921 धावांसह पहिल्या क्रमांकावर आहे, परंतु रुट लवकरच रिकी पॉन्टिंग, जॅक कॅलिस आणि राहुल द्रविड यांना मागे टाकू शकतो. त्यांना मागे टाकण्यासाठी रुटला फार मोठी खेळी खेळण्याची गरज नाही. जर कसोटी क्रिकेटमध्ये सर्वाधिक धावा करणाऱ्या फलंदाजांबद्दल बोलायचे झाल्यास, रुट सध्या त्या यादीत 5व्या क्रमांकावर आहे.