ISL 2024-25 FC Goa Vs East Bengal

पणजी: इंडियन सुपर लीग (आयएसएल) फुटबॉल स्पर्धेत लागोपाठ दोन बरोबरी नोंदविल्यामुळे एफसी गोवाच्या शिल्ड जिंकण्याच्या इच्छेला थोडाफार तडा गेला, आता त्यांनी पुन्हा मुसंडी घेत विजयी कामगिरी निर्धार बाळगला आहे. या पार्श्वभूमीवर रविवारी (ता. १९) फातोर्डा येथील पंडित जवाहरलाल नेहरू स्टेडियमवर मानोलो मार्केझ यांच्या मार्गदर्शनाखालील संघाला ईस्ट बंगालच्या आव्हानास सामोरे जावे लागेल.

एफसी गोवाचे सध्या १५ सामन्यांतून २७ गुण झाले आहेत. रविवारी विजयाचे पूर्ण तीन गुण मिळाल्यास ते दुसऱ्या स्थानी येतील. त्या अनुषंगाने मार्केझ यांनी शनिवारी सांगितले, की ‘‘प्रत्येक सामना खडतर आहे, सहज गुण मिळणार नाही अशा टप्प्यावर आलो आहोत.

आता आमच्यासाठी पुढील सामने महत्त्वाचे आहेत. कामगिरीवर ध्यान केंद्रित करणे आवश्यक असून रविवारी जिंकणे हेच ध्येय आहे.’’ मार्केझ यांनी ईस्ट बंगालला कमी लेखले नाही. ते म्हणाले, गुणतक्त्यातील स्थितीनुसार त्यांची तुलना करणे अयोग्य आहे. निश्चितच सामना कठीण असेल.

ईस्ट बंगालचे १५ सामन्यांतून १४ गुण आहेत. प्रशिक्षक ऑस्कर ब्रुझाँ यांना त्याची जाणीव आहे, मात्र ते प्ले-ऑफ फेरी गाठण्याबाबत आशावादी आहेत. त्यांनी आता ओळीने तीन सामने जिंकण्याचे उद्दिष्ट राखले आहे. एफसी गोवा संघ ताकदवान असला, तरी आम्ही विजयी कामगिरीसाठी इच्छुक असल्याचे ब्रुझाँ यांनी सांगितले.