रायपूर: क्षमता असूनही विविध कारणांमुळे गेल्या दोन वर्षांत भारतीय संघातून दूर राहणारा ईशान किशन स्वतःला एकच प्रश्न विचारत होता... मी पुन्हा भारतीय जर्सी परिधान करू शकतो का आणि तशी निर्णायक कामगिरी करू शकतो का? या प्रश्नाचे उत्तर त्याने स्वतःच शुक्रवारी झंझावाती फलंदाजी करून दिले.

टी-२० विश्वकरंडक स्पर्धेसह न्यूझीलंडविरुद्धच्या मालिकेसाठी भारतीय संघात पुनरागमन करण्याची संधी मिळालेल्या ईशान किशनने शुक्रवारी झालेल्या सामन्यात ३२ चेंडूंत ७६ धावांचा घणाघात सादर केला आणि आपली क्षमता तसेच उपयुक्तता सिद्ध केली.

ईशानला भारतीय संघात स्थान मिळत नव्हते. त्या वेळी कशी भावना मनात होती, याबाबत विचारले असता तो म्हणाला, मी प्रत्येक वेळी स्वतःला एकच प्रश्न विचारायचो, मी पुन्हा तशीच फलंदाजी करू शकतो की नाही? आणि त्याचे उत्तर सकारात्मकच होते.

मी स्वतःसमोर उपस्थित केलेल्या प्रश्नाचे उत्तर देण्यासाठी मला देशांतर्गत स्पर्धांत धावा करणे गरजेचे होते. पुन्हा देशासाठी खेळण्याकरिता स्वतःला सिद्ध करण्याचीही गरज होती. त्यासाठी देशांतर्गत क्रिकेट खेळणे महत्त्वाचे होते, असे तो म्हणाला.