I League Sporting Club Vs TRAU FC

पणजी: रोनाल्डो ऑलिव्हेरा याने सामन्याच्या पूर्वार्धात केलेल्या गोलमुळे स्पोर्टिंग क्लब द गोवा संघाने आय-लीग २ फुटबॉल स्पर्धेत गुरुवारी विजयाचे पूर्ण तीन गुण प्राप्त केले. त्यांनी मणिपूरमधील टिड्डिम रोड ॲथलेटिक युनियन (ट्राऊ) एफसीवर १-० फरकाने निसटती मात केली. सामना एला-जुने गोवे येथील मैदानावर झाला.

सामन्याच्या ४०व्या मिनिटास रोनाल्डोने स्पोर्टिंग गोवाला आघाडी मिळवून दिली. त्यांचा हा स्पर्धेतील दुसरा विजय ठरला. त्यामुळे पाच लढतीनंतर सात गुण झाले असून गुणवतक्त्यात पाचवा क्रमांक मिळाला. ट्राऊ एफसीला चौथ्या पराभवास सामोरे जावे लागले.

पाच लढतीनंतर फक्त एका गुणासह ते आठव्या क्रमांकावर कायम राहिले. स्पोर्टिंगचा पुढील सामना घरच्या मैदानावर होणार असून त्यांच्यासमोर नेरोका एफसीचे आव्हान असेल.

चानमारी एफसीचा विजयी धडाका

मिझोराममधील चामनारी एफसीने आय-लीग २ फुटबॉल स्पर्धेतील धडाका कायम राखताना स्पोर्टस अकादमी तिरुर संघाला ३-० फरकाने हरविले. स्पर्धेतील पाचव्या विजयामुळे अपराजित असलेल्या चानमारी एफसीचे सहा सामन्यांतून १६ गुण असून ते अग्रस्थानी आहेत. तिरुर संघ १० गुणांसह तिसऱ्या क्रमांकावर कायम राहिला. सामना ऐजॉल येथे झाला.