I League Dempo Club Vs Rajasthan United

पणजी: आय-लीग फुटबॉल स्पर्धेत मागील लढतीत धेंपो क्लबने राबवलेली ‘ऑल इंडिया’ खेळाडूंची रणनीती यशस्वी ठरली, पण प्रभावी परदेशी खेळाडूंचा भरणा असलेल्या राजस्थान युनायटेडविरुद्ध नियोजन फोल ठरले, परिणामी माजी विजेत्यांवर शनिवारी ४-० फरकाने मोठ्या पराभवाची नामुष्की आली.

सामना फातोर्डा येथील पंडित जवाहरलाल नेहरू स्टेडियमवर झाला. जेरार्ड अर्टिगस याने ४५व्या मिनिटास केलेल्या गोलमुळे पाहुणा संघ विश्रांतीला एका गोलने आघाडीवर होता.

नंतर बदली खेळाडू लुकास रॉड्रिगेझ याने ४९व्या, पांगाम्बा नाओबा मेतेई याने ६१व्या, तर अलेन ओयार्झून याने ८७व्या मिनिटास केलेल्या प्रत्येकी एक गोलमुळे राजस्थान युनायटेडने मोठ्या विजयाची नोंद केली. पहिल्या टप्प्यात उभय संघांतील जयपूर येथे झालेला सामना १-१ गोलबरोबरीत राहिला होता.

राजस्थान युनायटेड आता सलग सहा सामने (३ विजय, ३ बरोबरी) अपराजित आहे. त्यांनी शनिवारी पाचव्या विजयाची नोंद केली. त्यामुळे १२ लढतीतून १९ गुणांसह त्यांना पहिल्या पाच संघांत स्थान मिळाले. धेंपो क्लबला सहावा पराभव पत्करावा लागला. १२ लढतीनंतर त्यांचे १४ गुण व आठवा क्रमांक कायम राहिला.