I League Dempo Club Vs Rajasthan United

पणजी: संघातील परदेशी खेळाडू पूर्ण तंदुरुस्त नसल्यामुळे धेंपो स्पोर्टस क्लबने आय-लीग फुटबॉल स्पर्धेत दिल्ली एफसीविरुद्ध मागील लढतीत सर्व भारतीय खेळाडूंचा सुरवातीचा अकरा सदस्यीय संघ मैदानात उतरविला. आता राजस्थान युनायटेडविरुद्धही शनिवारी (ता. १) मुख्य प्रशिक्षक समीर नाईक तोच संघ कायम राखू शकतात.

धेंपो क्लब व राजस्थान युनायटेड यांच्यातील सामना फातोर्डा येथील पंडित जवाहरलाल नेहरू स्टेडियमवर शनिवारी खेळला जाईल. धेंपो क्लबचे सध्या ११ लढतीतून १४ गुण असून आठव्या क्रमांकावर आहेत. राजस्थान युनायटेड सलग पाच सामने अपराजित (२ विजय, ३ बरोबरी) आहे. ११ लढतीतून १६ गुणांसह ते सातव्या क्रमांकावर आहेत. पहिल्या टप्प्यात जयपूर येथे उभय संघांतील सामना १-१ गोलबरोबरीत राहिला होता.

पत्रकार परिषदेत धेंपो क्लबचे मुख्य प्रशिक्षक समीर नाईक यांनी पुन्हा एकदा सुरवातीच्या अकरा सदस्यीय संघात सर्व भारतीय खेळाडूंची शक्यता नाकारली नाही. ‘‘सामन्याच्या दिवशी सकाळी संघ निश्चित होईल. कदाचित मागील सामन्यातील संघच कायम राहू शकतो. खेळाडूंच्या उपलब्धतेवर सारे काही अवलंबून आहेत. आमच्या संघातील भारतीय खेळाडू छान खेळ करत असून मी त्यांच्या कामगिरीवर समाधानी आहे,’’ असे समीर यांनी सांगितले.