I League 2024 Dempo Club Vs Namdhari FC Football Match

पणजी: आय-लीग फुटबॉल स्पर्धेत नऊ वर्षांनंतर पुनरागमन करणाऱ्या माजी विजेत्या धेंपो स्पोर्टस क्लबने मागील दोन सामन्यांत उल्लेखनीय खेळ करताना अपराजित कामगिरी नोंदविली. मंगळवारी (ता. ३) लुधियाना येथे त्यांच्यासमोर नामधारी स्पोर्टस अकादमीचे आव्हान असेल. या लढतीत विजय नोंदविल्यास गोव्यातील संघाला गुणतक्त्यात प्रगतीची संधी असेल.

सध्या दुसऱ्या फेरीतीनंतर धेंपो क्लबच्या खाती विजय व बरोबरीसह चार गुण आहेत. मागील लढतीत त्यांनी शिलाँग येथे शिलाँग लाजाँग एफसीवर २-० फरकाने मात केली होती. त्यापूर्वी ऐजॉल एफसीला गोलशून्य बरोबरीत रोखले होते. नामधारी संघाच्या खाती फक्त एक गुण आहे. त्यांनी दिल्ली एफसीला गोलशून्य बरोबरीत रोखले, तर राजस्थान युनायटेडकडून त्यांना १-३ फरकाने पराभव पत्करावा लागला.

धेंपो क्लबसाठी शिलाँग लाजाँगविरुद्ध पृथ्वेश पेडणेकर व मातिया बाबोविच यांनी प्रत्येकी एक गोल केला होता. नामधारी संघ मंगळवारी प्रमुख खेळाडू मनवीर सिंग याच्याविना मैदानात उतरेल. राजस्थान युनायटेडविरुद्ध त्याला रेड कार्ड मिळाले होते. धेंपो क्लबचे प्रशिक्षक समीर नाईक यांनी सांगितले, की ‘‘खेळाडूंना जबाबदारीचे भान आहे, त्याचवेळी ते खेळाचा आनंदही लुटत आहेत. पुढील लढतीसाठी संघ उत्सुक आहे. स्पर्धा आताच कुठे सुरू झालेली आहे. त्यामुळे संभाव्य विजेत्यांबाबत भाकीत करता येणार नाही. माझ्यामते प्रत्येक संघ तुल्यबळ असून त्यांच्यात सामना जिंकण्याची क्षमता आहे.’’

सलग प्रवासाचा त्रास

धेंपो क्लबला सलग प्रवासाचा त्रास होऊ शकतो. कारण ईशान्य भारतातील शिलाँग येथे सामना खेळल्यानंतर लगेच त्यांना लुधियानासाठी रवाना व्हावे लागले. संघ रविवारी पहाटे पाच वाजता शिलाँग येथून निघाला व पंजाबमध्ये संध्याकाळी सात वाजता दाखल झाला. ‘‘प्रवास व्यस्त असला, तरी व्यावसायिक या नात्याने आम्हाला आव्हानास सामोरे जावेच लागेल. मी जेव्हा खेळत होतो तेव्हाही अशीच परिस्थिती असायची. आम्ही त्याचा कणखरपणे सामना केला. धेंपो संघाचे हे वैशिष्ट आहे, त्यामुळे संघाकडून मला चांगल्या कामगिरीचा विश्वास आहे,’’ असे समीर यांनी नमूद केले.