37th National Chess Championship Mysore

पणजी: म्हैसूर येथे झालेल्या ३७व्या राष्ट्रीय सात वर्षांखालील वयोगटातील बुद्धिबळ स्पर्धेत गोव्याच्या प्रयांक गावकर याने रौप्यपदक जिंकले. प्रयांक (एलो गुण १४९१) याने अखेरच्या फेरीत तमिळनाडूच्या केविन वेलावन याला नमवून रौप्यपदकावर शिक्कामोर्तब केले. त्याने नऊ फेऱ्यांत आठ विजय व एक पराभव या कामगिरीसह आठ गुणांची कमाई केली. केरळचा काल्लियथ देवनारायणन याने सर्व डाव जिंकत नऊ गुणांसह सुवर्णपदक प्राप्त केले. पश्चिम बंगालचा आराध्यो गुईन साडेसात गुणांसह ब्राँझपदकाचा मानकरी ठरला.

प्रयांकने राष्ट्रीय रौप्यपदकासह स्पर्धेतून ६५ एलो गुणांचीही कमाई केली. त्याने दुसऱ्या फेरीतील पराभवनंतर ओळीने सात डाव जिंकून खुल्या गटात दुसरा क्रमांक पटकावला. तो मडगाव येथील मनोविकास इंग्लिश स्कूलमध्ये पहिल्या इयत्तेत शिकतो. गोवा बुद्धिबळ संघटनेचे अध्यक्ष महेश कांदोळकर, सचिव आशेष केणी व इतर पदाधिकाऱ्यांनी पदक विजेत्या प्रयांकचे अभिनंदन केले आहे.