पणजी: गोव्याचा १८ वर्षीय प्रतिभाशाली वेगवान गोलंदाज चिगुरुपती व्यंकट याने शुक्रवारी राजकोट येथील निरंजन शाह स्टेडियमवर भारताच्या १९ वर्षांखालील संघातून युवा एकदिवसीय आंतरराष्ट्रीय पदार्पण केले. ऑस्ट्रेलियाच्या १९ वर्षांखालील संघाविरुद्ध यजमानांनी सात धावांनी विजय मिळविला, त्यात व्यंकटने एक विकेट प्राप्त केली.

राजकोटमधील पावसाच्या व्यत्ययामुळे सामना प्रत्येकी २० षटकांचा खेळविण्यात आला. भारताने प्रथम फलंदाजी करताना ६ बाद १८२ धावा केल्यानंतर ऑस्ट्रेलियाला ७ बाद १७५ धावांत रोखले. व्यंकट याने ऑस्ट्रेलियाचा कर्णधार जॅक झोस्नेक (५५ धावा) याचा महत्त्वपूर्ण बळी घेताना ३ षटकांत ३९ धावा मोजल्या. नव्या चेंडूने त्याने डावाची सुरवात केली.

भारताच्या १९ वर्षांखालील संघातून एकदिवसीय आंतरराष्ट्रीय क्रिकेट खेळणारा व्यंकट हा सौरभ बांदेकर व हेरंब परब यांच्यानंतरचा तिसरा गोमंतकीय युवा क्रिकेटपटू ठरला. विशेष बाब म्हणजे, तिघेही वेगवान गोलंदाज आहेत.

व्यंकट याने यावर्षी जुलैमध्ये कोलंबोतील आर. प्रेमदासा स्टेडियमवर श्रीलंका १९ वर्षांखालील संघाविरुद्ध भारतातर्फे युवा कसोटी (मल्टि-डे) क्रिकेटमध्ये पदार्पण केले होते. त्या सामन्यात त्याने दोन्ही डावांत मिळून पाच गडी बाद केले होते. ऑस्ट्रेलिया १९ वर्षांखालील संघाविरुद्धच्या एकदिवसीय मालिकेत आणखी दोन सामने बाकी आहेत.

सेहवाग यांच्या मुलाचाही पहिला सामना

ऑस्ट्रेलिया १९ वर्षांखालील संघाविरुद्ध भारताचा महान क्रिकेटपटू वीरेंद्र सेहवाग यांचा मुलगा आर्यवीर सेहवाग यानेही १९ वर्षांखालील एकदिवसीय आंतरराष्ट्रीय क्रिकेटमध्ये पदार्पण केले. त्याने सलामीला फलंदाजी करताना २८ धावा केल्या. या सामन्यात महान फलंदाज राहुल द्रविड यांचा मुलगा यष्टिरक्षक अन्वय द्रविड (१८ चेंडूंत ३८ धावा) हा सुद्धा खेळला.