गोव्याच्या पूर्वी नाईक हिने ओडिशातील भुवनेश्वर येथे सुरू असलेल्या राष्ट्रीय सबज्युनियर-ज्युनियर जलतरण स्पर्धेत सलग दुसरे पदक जिंकले. बुधवारी तिने १०० मीटर फ्रीस्टाईलमध्ये रौप्यपदकाची कमाई केली.

पूर्वी हिने मंगळवारी स्पर्धेच्या पहिल्या दिवशी मुलींच्या गट तीनमधील २०० मीटर फ्रीस्टाईल शर्यतीत २ मिनिटे ३०.६२ सेकंद वेळेसह ब्राँझपदक पटकावले. बुधवारी पदकाचा रंग बदलताना तिने १०० मीटर फ्रीस्टाईल शर्यतीत १ मिनिट ०७.२३ सेकंद वेळेसह दुसरा क्रमांक पटकावला. हरियानाची सेरेना सरोहा हिने १ मिनिट ०६.६७ सेकंद वेळेसह सुवर्णपदक जिंकले. या शर्यतीत सकाळच्या सत्रातील पात्रता फेरीत पूर्वी हिने १ मिनिट ०७.७४ सेकंद वेळ नोंदविली होती, नंतर मुख्य शर्यतीतील कामगिरीत सुधारणा करत रौप्यपदकावर हक्क सांगितला.

मूळ हरवळे-साखळी येथील पूर्वी नाईक कांपाल-पणजी येथील खेलो इंडिया राज्य उत्कृष्टता केंद्रातील जलतरण प्रशिक्षणार्थी आहे. तिला प्रशिक्षक टी. ए. सुजित यांचे मार्गदर्शन लाभले. ती कुजिरा येथील मुष्टिफंड हायस्कूलमध्ये सहाव्या इयत्तेत शिकते.