पणजी: कांपाल येथे सुमारे ३५ कोटी रुपये खर्चून उभारण्यात आलेली बहुउद्देशीय क्रीडा व व्यापारी सुविधा खासगी संस्थेमार्फत चालविण्याचा निर्णय राज्य सरकारने घेतला आहे. या सुविधेच्या संचालनासाठी १० वर्षांच्या व्यापारी परवान्याअंतर्गत खासगी संचालकाची निवड करण्यात येणार असून, त्यासाठी स्पर्धात्मक निविदा प्रक्रिया राबविण्यात येणार आहे.

या प्रक्रियेसाठी गोवा राज्य नागरी विकास संस्थेने (जीसुडा) विशेष सल्लागार संस्थेची नियुक्ती करण्यासाठी निविदा मागवल्या आहेत. ही संस्था निविदा प्रक्रिया, अटी-शर्ती, आर्थिक आराखडा तसेच खासगी संचालकाची निवड या संपूर्ण प्रक्रियेचे नियोजन व व्यवस्थापन करणार आहे.

सुमारे ४० हजार चौरस मीटर क्षेत्रावर उभारण्यात आलेल्या या संकुलात नैसर्गिक गवताचे फुटबॉल मैदान, क्रीडा प्रशिक्षण अकादमीसाठी जागा, सुमारे ४०० ते ५०० चौरस मीटरचे उच्च दर्जाचे उपाहारगृह, वाहनतळाची सुविधा तसेच जाहिरातींसाठी स्वतंत्र जागा उपलब्ध आहे. क्रीडा उपक्रमांसह व्यापारी उपक्रमांद्वारे या संकुलाचा अधिक प्रभावी वापर करण्याचा सरकारचा उद्देश आहे.

महत्त्वाच्या अटी

खासगी संचालकासोबत करण्यात येणाऱ्या करारात काही महत्त्वाच्या अटींचाही समावेश करण्यात आला आहे. त्यानुसार दरवर्षी ३० दिवस ही सुविधा शासनाच्या कार्यक्रमांसाठी कोणतेही शुल्क न आकारता उपलब्ध करून द्यावी लागणार आहे. तसेच क्रीडा अकादमीत स्थानिक आर्थिकदृष्ट्या दुर्बल घटकांतील जीएसयूडीएने नामनिर्देशित केलेल्या युवकांसाठी किमान १० टक्के जागा विनामूल्य राखून ठेवणे बंधनकारक असेल.