पणजी: गोव्याचा युवा मध्यमगती गोलंदाज चिगुरुपती व्यंकट याला आगामी १९ वर्षांखालील आशिया करंडक क्रिकेट स्पर्धेसाठी भारतीय संघात संधी मिळाली आहे. यासंबंधी माहिती गोवा क्रिकेट असोसिएशनकडून (जीसीए) शनिवारी देण्यात आली.

प्राप्त माहितीनुसार, भारतीय क्रिकेट नियामक मंडळाच्या (बीसीसीआय) ज्युनियर क्रिकेट समितीने शुक्रवारी १९ वर्षांखालील पुरुष आशिया करंडक स्पर्धेसाठी १५ सदस्यीय संघ निवडला होता, पण शाविन विनोद जायबंदी ठरल्यामुळे त्याच्या जागी व्यंकटची निवड झाली. अगोदर व्यंकट राखीव होता. जीसीए अध्यक्ष महेश देसाई, उपाध्यक्ष परेश फडते, सचिव तुळशीदास शेट्ये, खजिनदार अब्दुल माजिद, तसेच व्यवस्थापकीय समितीने व्यंकटचे अभिनंदन केले आहे.

आशिया करंडक स्पर्धा ओमानमध्ये खेळली जाणार असून भारताच्या गटात संयुक्त अरब अमिराती, पाकिस्तान व नेपाळ हे संघ आहेत. सहा नोव्हेंबरला भारतीय संघ नेपाळविरुद्ध खेळेल. त्यानंतर अनुक्रमे पाकिस्तान व संयुक्त अरब अमिरातीविरुद्ध लढत होईल. सर्व लढती मस्कत येथे होतील. लक्ष्य रायचंदानी भारतीय संघाचा कर्णधार असून भारताचे महान क्रिकेटपटू राहुल द्रविड व वीरेंद्र सेहवाग यांचे सुपुत्र अनुक्रमे अन्वय द्रविड व आर्यवीर सेहवाग यांचाही संघात समावेश आहे.

मागील सप्टेंबरमध्ये भारतात झालेल्या ऑस्ट्रेलियाविरुद्धच्या १९ वर्षांखालील एकदिवसीय मालिकेत व्यंकट भारतीय संघातून खेळला होता. त्याने दोन सामन्यांत चार गडी बाद केले. त्यापूर्वी, जुलैमध्ये कोलंबो येथे झालेल्या श्रीलंकेविरुद्धच्या १९ वर्षांखालील युवा कसोटी (मल्टि-डे) मालिकेतील सामन्यात व्यंकटने दोन्ही डावांत मिळून पाच गडी टिपले होते. १९ वर्षांखालील विनू मांकड करंडक एकदिवसीय क्रिकेट स्पर्धेत ऑक्टोबर महिन्याच्या सुरवातीस गोव्यातर्फे खेळताना व्यंकटने चार सामन्यांत आठ गडी बाद केले होते.