पणजी: गोव्याच्या मुलींनी अंतिम लढतीत यजमान तमिळनाडूस सहा विकेटने हरवून मिनी राष्ट्रीय १४ वर्षांखालील टेनिस बॉल क्रिकेट स्पर्धेत विजेतेपद पटकावले. स्पर्धा तमिळनाडू राज्यातील शोलिंगूर येथे झाली.

अंतिम लढतीत तमिळनाडूच्या मुलींनी निर्धारित सहा षटकांत ३ बाद २४ धावा केल्या. गोव्याच्या सनिका भोसले व पूजा राठोड यांनी प्रत्येकी विकेट मिळविली. प्रत्युत्तरादाखल गोव्याने २.१ षटकांत २ बाद २५ धावा करून विजेतेपदाच्या करंडकावर नाव कोरले.

आयुषी श्रीवास्तव हिने १७ धावा केल्या. त्यापूर्वी, उपांत्य लढतीत गोव्याने महाराष्ट्रावर सात धावांनी मात करून अंतिम फेरी गाठली होती. गोव्याच्या मुलांचे स्पर्धेतील आव्हान मात्र उपांत्यपूर्व फेरीतच संपुष्टात आले.