पणजी: गोव्याची अवघी नऊ वर्षीय प्रतिभाशाली बॅडमिंटनपटू अमायरा धुमटकर हिने ११ वर्षांखालील राष्ट्रीय बॅडमिंटन स्पर्धेत मुलींच्या एकेरीत ब्राँझपदक पटकावण्याचा पराक्रम साधला. तिचे पदक राज्य बॅडमिंटनमध्ये ऐतिहासिक ठरले, या वयोगटात राष्ट्रीय पदकाला गवसणी घालणारी ती पहिली गोमंतकीय बॅडमिंटनपटू ठरली.

गुजरातमधील बडोदा येथे झालेल्या स्पर्धेत अमायरा हिने उपांत्यपूर्व फेरीपर्यंत दणक्यात धडक मारली. चुरशीच्या लढतीत आंध्र प्रदेशच्या श्रीआध्या रेड्डी कडुलुरी हिच्यावर पहिला गेम गमावल्यानंतर १७-२१, २१-१७, २१-१५ असा रोमहर्षक विजय संपादन केला. उपांत्य लढतीत अमायरा हिने जबरदस्त जिगर प्रदर्शित केली, पण तिला थोडक्यात माघार घ्यावी लागली. तेलंगणाच्या सायना शर्मा हिला अमायराने पहिल्या गेममध्ये २१-२३ असे कमालीचे झुंजविले, मात्र दुसऱ्या गेममध्ये ९-२१ अशी माघार घ्यावी लागल्याने गुणवान गोमंतकीय खेळाडूचे अंतिम फेरी गाठण्याचे स्वप्न भंगले आणि फक्त दुसऱ्यांदा राष्ट्रीय स्पर्धेत खेळताना ब्राँझपदक मिळाले.

बडोदा येथील राष्ट्रीय स्पर्धेत अमायरा हिने मुलींच्या दुहेरीतही छाप पाडली. कोमल कोठारी हिच्यासह तिने उपांत्यपूर्व फेरीपर्यंत मजल मारली. गोवा बॅडमिंटन (Badminton) असोसिएशनचे अध्यक्ष मनोज पाटील यांनी अमायराच्या कामगिरीचे कौतुक करताना, “गोवा बॅडमिंटनसाठी अभिमानाचा आणि दीर्घ प्रतीक्षेनंतरचा ऐतिहासिक क्षण” असे म्हटले आहे. संघटने सचिव प्रवीण शेनॉय यांनी तिला “गोव्याची अत्यंत उज्वल आणि आशादायी तरुण खेळाडू” संबोधत स्पर्धेत दाखविलेल्या सातत्य आणि जिद्दीचे कौतुक केले.

१५ महिन्यांपासून बंगळूरुमध्ये अथक सराव

गोव्यात २०२४ पासून ११ वर्षांखालील मुलींच्या एकेरीत व दुहेरीत अव्वल मानांकित असलेली अमायर पंधरा महिन्यांपासून बंगळूर येथे अथक मेहनत घेत आहे. आता तिला बंगळूरस्थित पादुकोण बॅडमिंटन अकादमीत प्रवेश मिळाला असून तिथे ती जे. आर. श्रीनाथ यांच्या मार्गदर्शनाखाली सराव करते.

गोव्यात (Goa) सलग दोन वर्षे अपराजित असलेल्या अमायरा हिने कर्नाटक, तमिळनाडू, महाराष्ट्रातील बॅडमिंटन स्पर्धांत एकेरी, तसेच दुहेरीतील विजेतिपदे पटकावली आहे. गोव्यात वयाच्या सातव्या वर्षी तिने पहिले राज्यस्तरीय प्रमुख मानांकन स्पर्धा विजेतेपद मिळविले होते, तर २०२४ मध्ये वयाच्या आठव्या वर्षी ती पहिल्यांदा राष्ट्रीय बॅडमिंटन स्पर्धेत सहभागी झाली होती. गोव्यात तिने सीनियर प्रशिक्षक विनायक कामत यांच्या मार्गदर्शनाखालील बॅडमिंटनचे शास्त्रोक्त धडे गिरविले.