पणजी: सामन्याच्या पूर्वार्धातील ३२ मिनिटांत दोन गोल नोंदवून एफसी गोवाने यंदाच्या इंडियन सुपर लीग (आयएसएल) फुटबॉल स्पर्धेत पूर्ण तीन गुण प्राप्त केले. कोलकाता येथील किशोर भारती क्रीडांगणावर त्यांनी मोहम्मेडन स्पोर्टिंग क्लबवर २-० असा चमकदार विजय प्राप्त केला.

मागील लढतीत इंटर काशीविरुद्ध १-१ गोलबरोबरीवर समाधान मानलेल्या एफसी गोवाचे आता शुक्रवारच्या विजयामुळे दोन लढतीतून चार गुण झाले आहेत. मोहम्मेडन स्पोर्टिंगला सलग दुसरा पराभव पत्करावा लागला. अगोदरच्या लढतीत त्यांना जमशेदपूर एफसीने १-० असे हरविले होते. एफसी गोवाचा पुढील सामना २६ फेब्रुवारी रोजी फातोर्डा येथे स्पोर्टिंग क्लब दिल्लीविरुद्ध होईल.

सामन्याच्या चौथ्याच मिनिटास एफसी गोवास आघाडी मिळाली. द्राझिच याच्या भेदक कॉर्नर किकवर स्पॅनिश बचावपटू मोरेनो याने उंच उडी घेत अफलातून हेडिंग साधले. नंतर ३२व्या मिनिटास एफसी गोवाची आघाडी वाढली.

मोहम्मेडन स्पोर्टिंगच्या गोलरक्षकाने एफसी गोवाच्या उदांता सिंग याला गोलक्षेत्रात पाडले. यावेळी मिळालेल्या पेनल्टी फटक्यावर द्राझिच याने अचूक नेम साधला. ७२व्या मिनिटास माहितोश रॉय याचा फटका एफसी गोवाचा गोलरक्षक ऋतिक तिवारी याने अडविला, मात्र रिबाऊंडवर अगदी जवळून माकन विंकल चोथे याचा फटका गोलपट्टीवरून बाहेर गेल्यामुळे यजमान संघाला पिछाडी कमी करणे शक्य झाले नाही. त्यामुळे एफसी गोवास स्पर्धेत ‘क्लीन शीट’ राखणे शक्य झाले.

दृष्टिक्षेपात...

देयान द्राझिच याचे आता २ सामन्यांतून २ गोल

पोल मोरेनो याचा एफसी गोवातर्फे पहिलाच आयएसएल गोल

एफसी गोवाचा मोहम्मेडन स्पोर्टिंगवर सलग दुसरा विजय

गतवेळी ४ मार्च २०२५ रोजी फातोर्डा येथे २-० फरकाने विजयी