पणजी: मुख्य प्रशिक्षक समीर नाईक यांचा निर्णायक टप्प्यावर ‘सुपर सब’ (बदली खेळाडू) मैदानात उतरविण्याचा निर्णय समयोचित ठरला. सात मिनिटे बाकी असताना नेस्टर डायस याने नोंदवलेल्या गोलच्या बळावर धेंपो स्पोर्टस क्लबने आय-लीग फुटबॉल (Football) स्पर्धेत दिल्ली एफसीवर १-० फरकाने मात केली आणि पाच सामन्यानंतर पूर्ण तीन गुणांची कमाई केली.

सामना बुधवारी फातोर्डा येथील पंडित जवाहरलाल नेहरू स्टेडियमवर झाला. मागील पाच सामन्यांत चार विजय व एक बरोबरी अशी निराशाजनक कामगिरी केलेल्या पाच वेळच्या माजी विजेत्या धेंपो स्पोर्टस क्लबच्या युवा संघाने बुधवारी शानदार खेळ केला. प्रशिक्षक समीर यांनी प्रारंभी सर्व अकरा भारतीय खेळाडूंचा संघ मैदानात उतरविला. संघाने आक्रमक खेळ केला, पण संधीचे गोलमध्ये त्यांना रुपांतर करता येत नव्हते. सामन्याच्या ७४व्या मिनिटास समीर यांनी संघात तीन बदल केले. नेस्टर, कपिल होबळे, तसेच दुखापतीतून सावरलेला अर्जेंटिनाचा ख्रिस्तियन दामियन रोआ या बदली खेळाडूंना मैदानात धाडले. नऊ मिनिटानंतर माजी विजेत्यांना आघाडी मिळाली. कपिलच्या असिस्टवर नेस्टरने गोलशून्य बरोबरीची कोंडी फोडली.

धेंपो क्लबचा हा एकंदरीत चौथा विजय ठरला. त्यांचे ११ लढतीतून १४ गुण झाले असून गुणतक्त्यात सातवा क्रमांक मिळाला आहे. धेंपो क्लबचा पुढील सामना फातोर्डा येथेच राजस्थान युनायटेडविरुद्ध होईल. दिल्ली एफसीची निराशाजनक कामगिरी कायम राहिली. त्यांना सहावा पराभव पत्करावा लागला. त्यामुळे ११ लढतीनंतर ते नऊ गुणांसह अकराव्या क्रमांकावर कायम आहेत.