I League Football: धेंपो क्लब, राजस्थान सामना सुटला बरोबरीत! निर्णायक क्षणी गोलरक्षक आशिषने अडवला पेनल्टी फटका

I League Football Dempo Club Vs Rajasthan United

पणजी: सीरियन खेळाडू शाहेर शाहीन याचा उत्तरार्धातील गोल, तसेच गोलरक्षक आशिष सिबी याने अडवलेला पेनल्टी फटका या बळावर धेंपो स्पोर्टस क्लबने आय-लीग फुटबॉल स्पर्धेत राजस्थान युनायटेडला १-१ असे गोलबरोबरीत रोखले. सामना रविवारी जयपूर येथील विद्याधर नगर स्टेडियमवर झाला.

पृथ्वेश पेडणेकर याच्या हेडिंग असिस्टवर शाहीन याने ७६व्या मिनिटास माजी विजेत्यांना गोलबरोबरीत साधून दिली. त्यापूर्वी, पूर्वार्धात ३१व्या मिनिटास गेरार्ड आर्टिगास याच्या गोलमुळे राजस्थान युनायटेडने आघाडी घेतली होती.

त्यानंतर धेंपो क्लब खेळाडूच्या हँडबॉलमुळे यजमान संघाला पेनल्टी फटका मारला. मात्र गोलरक्षक आशिष याने अचूक अंदाज बांधत अलेन ओयार्झुन याचा फटका अडविल्यामुळे राजस्थान युनायटेडला ३८व्या मिनिटास आघाडी वाढविता आली नाही.

स्पर्धेत सलग तीन सामने गमावल्यानंतर धेंपो क्लबने गुणाची कमाई केली. एकंदरीत नऊ सामन्यांतील त्यांची ही दुसरी बरोबरी असून ११ गुण झाले आहेत. गुणतक्त्यात आता नवव्या क्रमांकावर असलेल्या या संघाचा पुढील सामना २६ जानेवारी रोजी श्रीनगर येथे रियल काश्मीरविरुद्ध होईल. राजस्थान युनायटेडचे तिसऱ्या बरोबरीमुळे नऊ सामन्यांतून १२ गुण झाले असून ते सातव्या स्थानी आहेत.