पणजी: नाबाद द्विशतकानंतर कर्णधार यश कसवणकर याने फिरकी गोलंदाजीवर भन्नाट मारा करताना शिवेन बोरकर याच्या साथीत गोव्याला कुचबिहार करंडक १९ वर्षांखालील क्रिकेट स्पर्धेतील मोहिमेस विजयी सुरवात करून दिली. एलिट ड गटातील लढतीत त्यांनी मंगळवारी यजमान छत्तीसगडला डाव व १३ धावांनी नमवून बोनस गुणाचीही कमाई केली.

छत्तीसगडमधील भिलाई येथे झालेला चार दिवसीय सामना तिसऱ्या दिवशी मंगळवारी संपला. डावाने विजय मिळविल्यामुळे गोव्याला एकूण सात गुण मिळाले. त्यांचा पुढील सामना २३ नोव्हेंबरपासून पणजी जिमखान्याच्या भाऊसाहेब बांदोडकर मैदानावर होईल.

गोव्याने दुसऱ्या दिवसअखेरच्या ९ बाद २३८ धावांवर डाव घोषित करून २१९ धावांची भक्कम आघाडी संपादन केली. यश कसवणकर २४३ धावांवर नाबाद राहिला. नंतर गोलंदाजीत गोव्याची फिरकी प्रभावी ठरली.

ऑफस्पिनर यश कसवणकर व लेगस्पिनर शिवेन बोरकर यांनी छत्तीसगडचा दुसरा डाव चहापानानंतर २०६ धावांत गुंडाळला. यश याने ४० धावांत ५, तर शिवेन याने ७० धावांत ३ गडी बाद केले. सामन्यात पहिल्या डावात २ गडी बाद केलेल्या गोव्याच्या कर्णधाराने दोन्ही डावांत मिळून ८७ धावांत ७ गडी टिपले.

संक्षिप्त धावफलक : छत्तीसगड, पहिला डाव : १७०. गोवा, पहिला डाव : ९ बाद ३८९ घोषित. छत्तीसगड, दुसरा डाव : ७८.४ षटकांत सर्वबाद २०६ (यशकुमार वर्धा ४६, विकल्प तिवारी ४२, वेदांश खेडिया ३३, समर्थ राणे ७-१-२१-०, चिगुरुपती व्यंकट ८-२-२३-१, मिहीर कुडाळकर १०-३-३३-०, यश कसवणकर २८.४-९-४०-५, शिवेन बोरकर २५-८-७०-३).