पणजी: माजी विजेत्या चर्चिल ब्रदर्सने बुधवारी यावेळच्या आय-लीग फुटबॉल स्पर्धेतील पहिल्या विजयाची नोंद केली. एका गोलच्या पिछाडीवरून जोरदार मुसंडी मारताना त्यांनी स्पोर्टिंग क्लब बंगळूरवर ३-१ फरकाने मात केली.

सामना बंगळूर येथे झाला. सामन्याच्या १२व्या मिनिटास जॉर्डन गार्रिडो याने केलेल्या गोलमुळे यजमान संघापाशी आघाडी जमा झाली. मागील लढतीत श्रीनिदी डेक्कनविरुद्ध पराभूत झालेल्या चर्चिल ब्रदर्सने पिछाडीनंतर सामन्यात जोरदार पुनरागमन साधले. कोलंबियन सेबॅस्टियन गुटिएर्रेझ याने २५व्या मिनिटास बरोबरीचा गोल नोंदविला. सेनेगलच्या पापे गास्सामा याने ३८व्या मिनिटास गोल केल्यामुळे विश्रांतीला चर्चिल ब्रदर्सने २-१ असे वर्चस्व प्रस्थापित केले होते. त्यांच्यासाठी सामन्यातील तिसरा गोल ८१व्या मिनिटास दक्षिण आफ्रिकन वेड लेके याने नोंदविला. त्याचा हा स्पर्धेतील वैयक्तिक तिसरा गोल ठरला.

स्पर्धेत तीन सामने खेळल्यानंतर चर्चिल ब्रदर्सचे आता चार गुण झाले असून ते सहाव्या क्रमांकावर आहेत. त्यांचा पुढील सामना सात डिसेंबर रोजी कोझिकोड येथे गोकुळम केरळा संघाविरुद्ध होईल. स्पोर्टिंग क्लब बंगळूर संघ अजून विजयाविना आहे. त्यांना तिन्ही लढतीत पराभूत व्हावे लागले असून ते अखेरच्या बाराव्या क्रमांकावर आहेत. श्रीनगर येथे बुधवारी रियल काश्मीरने दिल्ली एफसीवर २-१ फरकाने विजय नोंदवून सात गुणांसह अव्वल स्थानी असलेल्या धेंपो स्पोर्टस क्लबला गाठले.