Chandan Caro Goa Grabs Gold Medal In Table Tennis

पणजी: गोव्याचा प्रतिभाशाली युवा टेबल टेनिसपटू चंदन सिनाई कारे याने यूटीटी राष्ट्रीय मानांकन टेबल टेनिस स्पर्धेत १३ वर्षांखालील मुलांच्या एकेरीत सुवर्णपदकाची कमाई केली. स्पर्धा तिरुवनंतपुरम येथे झाली.

चंदनने अंतिम लढतीत तमिळनाडूच्या जे. एन. संजय अरविंद याच्यावर चार गेममध्ये ११-६, ८-११, ११-८, ११-९ फरकाने मात केली. त्यापूर्वी अटीतटीच्या उपांत्य लढतीत चंदनने पश्चिम बंगालच्या रिशान चट्टोपाध्याय याच्यावर १२-१०, १३-११, ७-११, ६-११, १६-१४ असा विजय नोंदवून आगेकूच राखली होती.

फातोर्डा येथील दक्षिण गोवा टेबल टेनिस अकादमीचे प्रशिक्षक राजा दयाल यांचे मडगावस्थित चंदनला मार्गदर्शन लाभते. राष्ट्रीय मानांकन स्पर्धेत विजेतेपद पटकावलेल्या चंदन याचे गोवा टेबल टेनिस संघटनेचे अध्यक्ष सुदिन वेरेकर यांनी अभिनंदन केले आहे. ‘‘चंदनची कामगिरी गोव्यासाठी अभिमानास्पद आहे, याद्वारे राज्यातील उदयोन्मुख प्रतिभा राष्ट्रीय टेबल टेनिसमध्ये उदयास येत साक्ष मिळते,’’ असे वेरेकर म्हणाले.