C K Nayudu U 23 Cricket Trophy 2024 Goa Vs Uttar Pradesh

पणजी: शतकवीर अझान थोटा याने देवनकुमार चित्तेम याच्यासह झुंझार फलंदाजी करताना १९४ धावांची सलामी दिली, त्या बळावर ३९३ धावांच्या पिछाडीवरून गोव्याने उत्तर प्रदेशविरुद्धचा कर्नल सी. के. नायडू करंडक २३ वर्षांखालील क्रिकेट सामना अनिर्णित राखण्यात यश मिळविले.

कानपूर येथील ग्रीन पार्क स्टेडियमवर झालेल्या या चार दिवसीय सामन्याच्या अखेरच्या दिवशी सोमवारी गोव्यासमोर सामना वाचविण्याचे कठीण आव्हान होते. फॉलोऑननंतर तिसऱ्या दिवसअखेरच्या बिनबाद १०७ धावांवरून अझान व देवन यांनी समजूतदारपणे फलंदाजी करताना खराब चेंडूंचा समाचार घेतला. अझान याने शानदार १११ धावा करताना १४९ चेंडूंतील खेळीत १४ चौकार मारले. देवनकुमार ८२ धावांवर बाद झाला. त्याने २०७ चेंडूंत दहा चौकार मारले.

दोघेही जम बसलेले फलंदाज २६ धावांत माघारी फिरल्यानंतर कर्णधार कौशल हट्टंगडी (२८) याने आक्रमक शैलीच्या शिवेंद्र भुजबळ (४१) याच्या साथीत उत्तर प्रदेशचा संघ सामन्याची सूत्रे हाती घेणार नाही याची खात्री बाळगली. त्यांनी तिसऱ्या विकेटसाठी ६३ धावांची अभेद्य भागीदारी केली. त्यामुळे अखेरच्या दिवशी चहापानाला दोन्ही संघांच्या मान्यतेने सामना अनिर्णित जाहीर करण्यात आला. गोव्याने दुसऱ्या डावात २ बाद २८३ धावा केल्या. खेळ थांबविण्याता तेव्हा ते ११० धावांनी मागे होते.

अनिर्णित लढतीतून गोव्याला चार गुण मिळाले. यामध्ये फलंदाजीत एक, गोलंदाजीत दोन, तर सामन्यातील एका गुणाचा समावेश आहे. उत्तर प्रदेशला १२ गुण मिळाले. त्यांना फलंदाजीत पाच, गोलंदाजीत चार व सामन्यातून तीन गुण प्राप्त झाले. स्पर्धेच्या पाचव्या फेरीनंतर ‘ब’ गटात उत्तर प्रदेशचे सर्वाधिक ६० गुण झाले असून ते अव्वल आहेत. गोव्याचे पाच सामन्यांतून २९ गुण झाले असून आठ संघांत ते सातव्या क्रमांकावर आहेत. त्यांचा पुढील सहावा सामना २५ जानेवारीपासून जम्मू-काश्मीरविरुद्ध सांगे येथे होईल, तर साखळी फेरीतील अखेरचा सामना एक फेब्रुवारीपासून गुजरातविरुद्ध वलसाड येथे खेळला जाईल.

संक्षिप्त धावफलक ः उत्तर प्रदेश, पहिला डाव ः ६ बाद ५८७ घोषित.

गोवा, पहिला डाव ः १९४ व दुसरा डाव (बिनबाद १०७ वरून) ः ८७ षटकांत २ बाद २८३ (अझान थोटा १११, देवनकुमार चित्तेम ८२, कौशल हट्टंगडी नाबाद २८, शिवेंद्र भुजबळ नाबाद ४१, रिषभ बंसल १-६०, स्वास्तिक १-१६).