CK Nayudu Trophy 2026 : गोव्याच्या २३ वर्षांखालील क्रिकेट संघातील फलंदाजांनी दुसऱ्या डावातही शरणागती पत्करल्यामुळे अपेक्षेनुसार कर्नल सी. के. नायडू करंडक क्रिकेट स्पर्धेत पंजाबने रविवारी डाव व २९६ धावांनी दणदणीत विजय मिळविला.

कोटार्ली-सांगे येथील जीसीए मैदानावर झालेला एलिट अ गट चार दिवसीय सामना रविवारी तिसऱ्या दिवशी उपाहारापूर्वीच संपला. पंजाबने पहिल्या डावात ५ बाद ५३३ अशी मोठी धावसंख्या उभारल्यानंतर गोव्याची शनिवारी दुसऱ्या दिवशी दाणादाण उडाली व त्यांचा पहिला डाव ९२ धावांत संपुष्टात आला होता.

४४१ धावांच्या आघाडीसह पंजाबने गोव्यावर फॉलोऑन लादला होता. दुसऱ्या दिवसअखेर गोव्याने दुसऱ्या डावात १ बाद ५८ धावा केल्या होत्या. रविवारी बाकी नऊ फलंदाज जास्त प्रतिकार करू शकले नाहीत व डाव १४५ धावांत संपुष्टात आला. या लढतीतून पंजाबला एकूण १६ गुण मिळाले.

यामध्ये फलंदाजीतील पाच, गोलंदाजीतील चार, तर बोनस गुणासह विजयाचे सात गुण आहेत. त्यांचा हा पाच सामन्यांतील तिसरा विजय ठरला. ६० गुणांसह त्यांनी अग्रस्थान मजबूत केले आहे. गोव्याला गोलंदाजीतील फक्त एकच गुण मिळाला.पाच लढतीतून त्यांचे २१ गुण असून ते आठ संघांत सातव्या क्रमांकावर आहेत. गोव्याचा हा स्पर्धेतील तिसरा पराभव ठरला. दुसऱ्यांदा त्यांना सामना डावाने गमवावा लागला. गोव्याचा स्पर्धेतील सहावा सामना केरळविरुद्ध त्रिवेंद्रम येथे ६ फेब्रुवारीपासून खेळला जाईल.

संक्षिप्त धावफलक

पंजाब, पहिला डाव ः ५ बाद ५३३ घोषित. गोवा, पहिला डाव ः ९२

गोवा, दुसरा डाव (फॉलोऑन, १ बाद ५८ वरून) ः ७०.३ षटकांत सर्वबाद १४५ (रिजुल पाठक १७, अनुज यादव ३७, जीवनकुमार चित्तेम ०, आर्यन नार्वेकर ३२, चिरुगुपती व्यंकट २, कौशल हट्टंगडी १६, अमन धूपर ०, मनीष काकोडे ०, समर्थ राणे नाबाद ०, फरदीन खान ०, हरजससिंग टंडन ३-५२, डेलव्ह कुमार गोयल २-१५, हवनीत सिंग ५-२५).