पणजी: मनीष काकोडे याच्या प्रभावी फिरकी गोलंदाजीमुळे कर्नल सी. के. नायडू करंडक २३ वर्षांखालील क्रिकेट सामन्यात शनिवारी गोव्याने जम्मू-काश्मीरवर पहिल्या डावात ७९ धावांची आघाडी घेतली. या लेगस्पिनरने ४९ धावांत ६ गडी बाद केले.

जम्मू येथे सुरू असलेल्या या सामन्याच्या दुसऱ्या दिवशी जम्मू-काश्मीरचा पहिला डाव २०७ धावांत आटोपला. पहिल्या डावात २८६ धावा केलेल्या गोव्याने दिवसाचा खेळ थांबला तेव्हा दुसऱ्या डावात बिनबाद २४ धावा केल्या होत्या. आता त्यांच्यापाशी एकूण १०३ धावांची आघाडी जमा झाली आहे.

मनीष आणि तीन गडी बाद केलेला डावखुरा फिरकी गोलंदाज अनुज यादव यांच्या फिरकी माऱ्याला तोंड देणे जम्मू-काश्मीरच्या फलंदाजांना शक्य झाले नाही.

संक्षिप्त धावफलक

गोवा, पहिला डाव ः २८६

जम्मू-काश्मीर, पहिला डाव (बिनबाद १० वरून) ः ७७.४ षटकांत सर्वबाद २०७ (आकाश भट २६, उधय परताप ६४, रिदम ४५, यश कसवणकर १९-४-५२-०, अनुज यादव २३.४-३-५७-३, समर्थ राणे ७-३-४-०,

सुजय नाईक ५-२-२४-१, मनीष काकोडे २२-७-४९-६, शंतनू नेवगी १-०-१६-०).

गोवा, दुसरा डाव ः १२ षटकांत बिनबाद २४ (सार्थक भिके नाबाद १३, आदित्य कोटा नाबाद ११).

गतवर्षीच्या कामगिरीची पुनरावृत्ती

मनीष काकोडे याने गतवर्षी जानेवारीत सांगे येथे झालेल्या कर्नल सी. के. नायडू करंडक स्पर्धेत जम्मू-काश्मीरविरुद्धच दुसऱ्या डावात ५८ धावांत ७ गडी बाद केले होते. याच संघाविरुद्ध त्याने शनिवारी मागील कामगिरीची पुनरावृत्ती केली. एकंदरीत त्या सामन्यात त्याने १० गडी (३-८३ व ७-५८) बाद करण्याचा पराक्रम साधला होता व गोव्याने चार विकेट राखून विजय नोंदविला होता.