Virat Kohli holiday house: कसोटी क्रिकेटमधून निवृत्ती घेलयानंतर टीम इंडियाचा धडाकेबाज फलंदाज विराट कोहली आणि त्याची पत्नी अभिनेत्री अनुष्का शर्मा यांच्या अलिबागमधील आलिशान बंगल्याची सध्या जोरदार चर्चा सुरू आहे. या जोडप्याने तब्बल ३२ कोटी रुपये खर्चून उभारलेल्या या स्वप्नवत घराचा व्हिडओ नुकताच समोर आला आहे आणि ते पाहून कुणीही थक्क होईल यात शंका नाही.

आर्किटेक्चरल डायजेस्ट यांच्या माहितीनुसार, विराट आणि अनुष्काच्या या सुट्टीतील घराची रचना जगप्रसिद्ध फिलिप फौचे यांच्या नेतृत्वाखालील स्टीफन अँटोनी ओल्मेस्डाहल ट्रुएन आर्किटेक्ट्स या संस्थेने केली आहे. निसर्गरम्य अलिबागमध्ये तब्बल ८ एकरच्या विस्तीर्ण जागेत हा व्हिला उभा आहे. या जोडप्याने ही जमीन २०२२ मध्ये सुमारे १९ कोटी रुपयांना खरेदी केली होती.

१०,००० चौरस फुटांच्या भव्य जागेत पसरलेल्या या व्हिलामध्ये आधुनिक सुखसोयींचा आणि सौंदर्यपूर्ण डिझाइनचा अप्रतिम संगम पाहायला मिळतो. सुसज्ज असं एक मोठं स्वयंपाकघर आहे.

चार आलिशान बाथरूम आणि एक जकूझी असल्याने आराम करण्याची सोय उपलब्ध आहे. घराबाहेर एक मोठी हिरवीगार बाग आहे, जिथे खेळण्याचा आणि निसर्गाचा आनंद घेता येतो. सुरक्षित झाकलेली पार्किंगची सोय आहे, तसेच कर्मचाऱ्यांसाठी स्वतंत्र निवासस्थान देखील आहे.

या मालमत्तेच्या बांधकामात उच्च दर्जाचे इटालियन मार्बल, प्राचीन दगड आणि तुर्की चुनखडीचा वापर करण्यात आला आहे, ज्यामुळे घराला एक खास आणि आकर्षक लुक मिळाला आहे. मिळालेल्या माहितीनुसार, विराटने या व्हिलाच्या बांधकामासाठी अंदाजे १०.५ कोटी ते १३ कोटी रुपये खर्च केले आहेत.

अनुष्का आणि विराटच्या अलिबाग व्हिलाचे सर्वात मोठे वैशिष्ट्य म्हणजे लिव्हिंग रूममधील दुहेरी उंचीचे खास डिझाइन केलेले कट-आउट सीलिंग, यामुळे घरात भरपूर नैसर्गिक प्रकाश येतो आणि सकारात्मक ऊर्जा टिकून राहते. या हॉलिडे होमच्या लिव्हिंग एरियामध्ये मोठे आणि आरामदायक सोफा सेट ठेवण्यात आले आहेत. भिंतींच्या पांढऱ्या रंगाला जुळणारे आकर्षक पडदे लावण्यात आले आहेत.

यासोबतच, घरात अनेक सुंदर रोपे आणि झाडे लावण्यात आली आहेत, ज्यामुळे एक ताजेतवाने आणि प्रसन्न वातावरण तयार झाले आहे. विराट आणि अनुष्काचा हा अलिबागमधील व्हिला म्हणजे खरंच एक स्वप्नवत घर आहे, जिथे आधुनिकता आणि निसर्गाचा सुंदर मिलाफ पाहायला मिळतो.