२०२५ मध्ये छावा, सैंयारा, धुरंधर या सिनेमांनी तुमचे मनोरंजन केले. आता 2026 हे वर्ष तुमच्यासाठी खास ठरणार आहे. बॉलिवूडने 2026 साठी एकापेक्षा एक भव्य चित्रपटांची रांग लावली असून, अ‍ॅक्शन, थ्रिलर, रोमांस ते मायथॉलॉजी असा सर्व मसाला मोठ्या पडद्यावर पाहायला मिळणार आहे. नववर्षाच्या पहिल्या दिवसापासून दिवाळीपर्यंत अनेक बहुप्रतीक्षित चित्रपट प्रेक्षकांचे मनोरंजन करणार आहेत.

नववर्षाच्या पहिल्या दिवशी, 1 जानेवारी 2026 रोजी श्रीराम राघवन दिग्दर्शित ‘इक्कीस’ हा चित्रपट प्रदर्शित होणार आहे. या चित्रपटात अगस्त्य नंदा आणि सिमर भाटिया प्रमुख भूमिकेत असून, हा धर्मेंद्र यांचा अखेरचा चित्रपट ठरणार आहे.

26 जानेवारी 2026 रोजी देशभक्तीने ओतप्रोत भरलेला ‘बॉर्डर 2’ प्रेक्षकांच्या भेटीला येईल. सनी देओल, वरुण धवन, दिलजीत दोसांझ आणि अहान शेट्टी यांची दमदार स्टारकास्ट या चित्रपटाचे खास आकर्षण आहे.

व्हॅलेंटाईन डे, 14 फेब्रुवारी 2026 रोजी ‘ओ रोमियो’ हा रोमँटिक चित्रपट प्रदर्शित होईल. शाहिद कपूर, तृप्ती डिमरी आणि तमन्ना भाटिया यांच्या भूमिका यात पाहायला मिळतील. त्यानंतर 27 फेब्रुवारीला राणी मुखर्जीची बहुप्रतीक्षित ‘मर्दानी 3’ सिनेमागृहात येण्याची शक्यता आहे.

मार्चमध्ये ‘धुरंधर 2’, एप्रिलमध्ये ‘अल्फा’, तर 2 ऑक्टोबर 2026 रोजी अजय देवगनचा ‘दृश्यम 3’ रिलीज होणार आहे. दिवाळी 2026 ला नितेश तिवारी दिग्दर्शित भव्य ‘रामायण’चा पहिला भाग येणार असून, शाहरुख खानचा ‘किंग’ आणि ‘लव अँड वॉर’ हे चित्रपटही 2026 मधील चर्चेतले प्रोजेक्ट्स ठरणार आहेत.