पणजी: बॉलीवूडमधील प्रसिद्ध अभिनेता अर्शद वारसीने गोव्यात १५० वर्षे जुने अलिशान पोर्तुगीज पद्धतीचे घर विकत घेतले आहे. या घराला अर्शद आणि त्याची पत्नी मारिया यांनी अतिशय सुंदर पद्धतीने सजवले आहे. स्वप्नातील या घराला आकर्षक करण्यासाठी दोघांनी कोणतीच कसर सोडली नाही. अलिकडेच अर्शदने या घराचा व्हिडिओ सोशल मिडियावर शेअर करत स्वप्नांचा पाठलाग करताना मदत केलेल्या अनेकांचे धन्यवाद मानले.

अर्शदने दोन वर्षापूर्वी गोव्यातील साळगाव येथे १५० वर्षे जुने पोर्तुगीज पद्धतीचे घर विकत घेतले. अर्शद आणि त्यांची पत्नी मारिया यांनी या घराचे नूतनीकरण करताना रंगरंगोटी केली, सजावटीसाठी विविध पद्धतीचे पेंटींग, मन प्रसन्न करणारे गार्डन, डायनिंग रुम यासह विविध पद्धतीचे आरास केली.

घराच्या बाह्य आणि अंतर्गत सुशोभीकरणासाठी दोघांनी कोणतीच कसर सोडली नाही. गोव्यात घर असावे अशी अर्शद आणि मारियाचे स्वप्न होते. हे स्वप्न पूर्ण झाल्याने दोघेही फार आनंदी आहेत.

नुकतेच अर्शदने गोव्यातील त्याचा घराचा एक व्हिडिओ शेअर केला आहे. "गोव्यातील माझे घर खूप सुंदर आहे. प्रत्येक दिवशी घराच्या वेगवेगळ्या ठिकाणी मी बसून आनंद घेऊ शकतो. आज मी घरातील या बाजुला बसण्याचा निर्णय घेतला आहे. हिरवागार परिसर पहा. एका आंब्याच्या झाडावर आंबे देखील लागलेत. आता येथे बसून आनंद घेण्याची वेळ आहे. माझ्या स्टार्सला धन्यवाद, मला हे सुंदर आयुष्य देणाऱ्या प्रत्येकाचे धन्यवाद", असे अर्शदने या व्हिडिओत म्हटले आहे.

व्हिडिओवर कलाकारांच्या प्रतिक्रिया!

अर्शदच्या या व्हिडिओवर कलाकारांनी प्रतिक्रिया व्यक्त केल्या आहेत. गायक संगीतकार अरमान मलिकने या व्हिडिओवर हार्टचे सिम्बॉल पोस्ट केले आहे. अभिनेत्री अमृता रावने हे स्वप्न सत्यात येण्यासाठी प्रयत्न केलेल्या मारियाचे देखील धन्यावद मान, अशी प्रतिक्रिया व्यक्त केली आहे. अभिनेत्री आदिती राव हायद्रीने देखील यावर ओएमजी अशी प्रतिक्रिया दिली आहे.

अर्शद - मारिया यांनी अतिशय कलात्मक पद्धतीने घराची रचना केलीय. घरातील रंगकाम, बैठक व्यवस्था, बेडरुम, डायनिंग रुम, रिडिंग रुम, बाल्कनी, पुस्तकांची शेल्फ, स्विमिंग पूल, गार्डन या सर्वांची अतिशय उत्तम पद्धतीने मांडणी करण्यात आली आहे. अर्शद मारियाचे हे घर ड्रीम होम असल्याचे दोघेही सांगतात.