पणजी: उत्पल पर्रीकर यांनी आज (गुरुवारी) पणजी मतदारसंघातून उमेदवारी अर्ज दाखल केला आहे. ते अपक्ष निवडणूक लढवणार आहेत. उत्पल भाजपकडून उमेदवारी मिळवण्यास आग्रही होते, मात्र भाजपने पणजीतून बाबुश मोन्सेरात यांना उभे केले. पक्षावर नाराज असलेल्या उत्पल पर्रीकर (Utpal Parrikar) यांनी भाजपला राम राम ठोकून स्वबळावर निवडणूक रिंगणात उतरण्याचा निर्णय घेतला. ते उमेदवारी अर्ज कधी भरणार, याकडे सर्वांचे लक्ष लागून होते. आज अखेर त्यांनी उमेदवारी अर्ज भरला. (Utpal Parrikar Panaji Goa Latest News)

"मी पणजी (Panaji) मतदारसंघातून अपक्ष उमेदवार म्हणून निवडणूक लढवणार आहे. मनोहर पर्रीकर यांना एवढी वर्षे पणजी लोकांनी मतदान केले कारण ते काही मूल्यांसाठी उभे होते. माझ्यातही ती मूल्ये आहेत. मी आशा करतो की पणजी मतदारसंघातील मतदार माझ्या पाठीशी उभे राहतील," असे उत्पल पर्रीकर म्हणाले.