Goa Election Update: भाजपचे मडगावचे उमेदवार म्हणून ज्यांचे नाव पुढे आणले होते ते मडगावतील बिल्डर डॉ. देश प्रभुदेसाई (Dr. Desh Prabhudesai) यांनी मडगाव भाजपातील (BJP) गटबाजीला कंटाळून रिंगणातून माघार घेण्याचा निर्णय घेतल्याची माहिती प्राप्त झाली. मडगाव भाजपातील गटबाजी पाहता येथून निवडणूक (Goa Elections) लढविणे कठीण असे त्यांनी प्रदेशाध्यक्ष सदानंद शेट तानावडे (Sadanand Shet Tanawade) आणि मुख्यमंत्री प्रमोद सावंत (CM Pramod Sawant) यांना कळविले आहे, अशी माहिती प्राप्त झाली आहे.

यासंबंधी डॉ. प्रभुदेसाई यांच्याशी संपर्क साधला असता त्यांनी स्पष्ट माहिती न देता मडगावतील वस्तुस्थिती आपण राज्यस्तरीय नेत्यांना कळविली आहे, असेच सांगितले. मडगाव भाजपातील गटबाजी मिटविण्यासाठी यावेळी नवीन उमेदवार म्हणून प्रभुदेसाई यांचे नाव सुचविण्यात आले होते. त्रयस्थ उमेदवार असल्याने सर्व गट एकत्र येऊन काम करतील अशी अपेक्षा होती. मात्र प्रभुदेसाई याना उमेदवारी जाहीर झाल्यानंतर भाई नायक यांनी यावेळी आपण व आपले कार्यकर्ते दिगंबर कामत (Digambar Kamat) यांच्या बरोबर अशी उघड भूमिका घेतली होती. तर प्रभुदेसाई यांच्या कार्यालय उद्घाटनाच्या कार्यक्रमावर मंडळ अध्यक्ष रुपेश महात्मे आणि सरचिटणीस केतन कुरतरकर यांनी बहिष्कार घातला होता.