कळंगुट : ‘टुगेदर फॉर बार्देश’चा नारा देत काँग्रेसच्या विजयाची जबाबदारी आपल्या खांद्यावर घेऊन काम करणारे कळंगुटचे उमेदवार तथा माजी मंत्री मायकल लोबो यांचे वारु अखेर बार्देशातील चारच जागांवर अडकून पडल्याने काँग्रेसचे सत्तास्थापनेचे स्वप्न भंगले आहे. राज्याच्या उर्वरीत भागातही मतदारांनी कॉंग्रेसला नाकारल्याने राज्यात काँग्रेसचे सरकार घडविण्याचे स्वप्न अधुरेच राहिल्याचे चित्र आहे.

शिवोलीतून कॉंग्रेसच्या (Congress) तिकीटावर दिलायला लोबो यांना निवडून आणण्यात इतिहास घडविण्यात लोबो यशस्वी ठरले आहेत. शिवोलीचे माजी आमदार तसेच मंत्री राहिलेल्या विनोद पालयेकर यांना त्यांच्याच गोवा फॉरवर्डने (Goa Forward Party) तिकीट नाकारल्याने स्वबळावर अपक्ष म्हणून निवडणुकीच्या रिंगणात उतरावं लागलं. लोबोंमुळे पालयेकर यांच्यावर शेवटी स्वत:चे डिपॉझिटही गमावून बसण्याची पाळी आली आहे.

शिवोलीत सतत चार वेळा निवडून येण्याचा विक्रम नावावर असलेल्या माजी आमदार तथा मंत्री असलेल्या दयानंद मांद्रेकर यांना मागच्या विधानसभा निवडणुकीनंतर सलग दुसरा पराभव पत्करावा लागल्याने भाजप (BJP) सरकारमध्ये पुन्हा एकदा मंत्री बनण्याची त्यांची संधी हुकली आहे. कळंगुटमधून भरघोस मतांनी तिसऱ्यांदा विजयी होत विजयाची हॅट्रीक साधणाऱ्या मायकल लोबोनी आपल्या विरोधकांना चेकमेट केल्याचे चित्र आहे.