डिचोली: निवडणुकीत आवाजी प्रचार संपून आर्थिक देवाणघेवाणीचा ''गुप्त प्रचार'' जेव्हा होतो तेव्हाच खऱ्या अर्थाने कोणत्या उमेदवाराचे पारडे जड आहे, हे स्पष्ट होते. डिचोली तालक्यातील डिचोली, मये व साखळी या तिन्ही मतदारसंघात या गुप्त प्रचाराने शेवटच्या दोन दिवसांत उमेदवारांनी समीकरणांची फेरजुळणी केल्याचे समजते.

डिचोलीत तिरंगी लढतीबाबत उत्सुकता

डिचोली मतदारसंघात लढत तिहेरी आहे. भाजपचे राजेश पाटणेकर, मगोपचे नरेश सावळ व अपक्ष उमेदवार डॉ. चंद्रकांत शेट्ये यांच्यातील तुल्यबळ लढाईत कॉंग्रेस व अन्य पक्ष काही पारंपरिक मते तेवढी खेचतील, असा जो अंदाज आधीपासूनच होता, त्याला शेवटच्या टप्प्यात बळकटी मिळाली. डॉ. शेट्ये यांचे आवाजी प्रचारावर निर्विवाद वर्चस्व होते. त्यांनी आपण सतत चर्चेच्या केंद्रस्थानी राहू, याची खबरदारी घेतली.

डिचोलीत सायंकाळी पाच वाजेपर्यंत 84 टक्क्यांचा पल्ला मतदानाने गाठला होता. हा प्रस्थापितविरोधी कौल असल्याचा अभिप्राय भाजप विरोधी गटांतून व्यक्त होत होता.

मयेत सायंकाळी पाच वाजेपर्यंत 80 टक्के मतदारांनी आपला हक्क बजावला होता. भाजपचे प्रेमेंद्र शेट, गोवा फॉरवर्डचे संतोष सावंत, मगोपचे प्रवीण झांट्ये,आपचे राजेश कळंगुटकर, अपक्ष उमेदवार मिलिंद कळंगुटकर तसेच आरजीचे श्रीकृष्ण परब कार्यकर्त्यांशी चर्चा करताना आढळले. मद्याचे चोरून वितरण झाल्याचा पुरावाही मिळाला. या मतदारसंघात विजेत्यांचे मताधिक्यही बरेच कमी असेल, याचा अंदाज सर्वत्र येत होता.