केपे: मतदानास केवळ दोन दिवस बाकी असताना केपेत ताणतणाव वाढत असून शनिवारी रात्री उपमुख्यमंत्री कवळेकर यांच्यावर हात घालण्याचा प्रयत्न झाल्याने स्थिती काही काळ हाताबाहेर गेली. केपे बाजारात उपजिल्हाधिकारी कार्यालया समोरच ही घटना घडली. त्यामुळे बाजारात मोठा जमाव निर्माण झाला. शेवटी पोलिसांनी हस्तक्षेप करून दोन्ही बाजूच्या कार्यकर्त्याना वेगळे केले.

केपे संवेदनशील भाग : काही दिवसांत कवळेकर आणि डिकॉस्टा यांच्या कार्यकर्त्यांमध्ये सतत वाद होत होते. याच परिस्थितीत आज बाबू कवळेकर रात्रीच्यावेळी आपल्या एका कार्यकर्त्यांच्या स्कूटरवरून फिरत असल्याने ते पैसे वाटायला फिरतात असा संशय व्यक्त करून डिकॉस्टा यांच्या कार्यकर्त्यानी त्यांना अडविण्याचा प्रयत्न केला.

यावेळी कवळेकर यांचे कार्यकर्तेही आक्रमक झाल्याने त्यांच्यात बाचाबाची झाली. यावेळी डिकॉस्ता यांच्या एका कार्यकर्त्याने कवळेकर यांना ढकलण्याचा प्रयत्न केला. शेवटी पोलिसांना पाचारण करण्यात आले.