पणजी : गोव्यात पुन्हा एकदा भाजपची सत्ता येणार हे स्पष्ट झालं आहे. मात्र असं असलं तरीही काही उमेदवारांनी निवडून आल्यानंतरही आपली नाराजी उघड केली आहे. बाबूश मोन्सेरात यांनी आपली नाराजी उघडपणे बोलून दाखवली आहे. भाजप कार्यकर्त्यांनी या विधानसभा निवडणुकीत आपल्याला साथ दिली नाही, असा थेट आरोप बाबूश यांनी केला आहे. तसंच पक्षाने कार्यकर्त्यांना शिस्त शिकवावी असंही बाबूश म्हणाले. आता भाजप नेत्यांनी बाबूश यांच्या मनधरणीचे प्रयत्न सुरु केले आहेत.

भाजपने गोव्यात (Goa) सत्तास्थापनेचा दावा करण्याची तयारी चालवली आहे. त्यामुळे आमदारांची नाराजी, तीही बाबूश मोन्सेरात यांच्यासारख्या आमदाराची नाराजी भाजपला परवडणारी नाही. साहजिकच बाबूश यांनी नाराजी व्यक्त करताच देवेंद्र फडणवीस आणि मुख्यमंत्री प्रमोद सावंत भाजप कार्यालयात दाखल झाले आहेत. पणजीत भाजप कार्यकर्त्यांनी आपल्याला पाठिंबा न दिल्याचा आरोप बाबूश यांनी केला आहे.

दरम्यान भाजप (BJP) आजच सत्तास्थापनेचा दावा करणार असल्याची माहिती आहे. पूर्ण बहुमत मिळालं तरीही अपक्ष आणि मगोपच्या आमदारांना सोबत घेऊन सरकार स्थापन करणार असल्याचं देवेंद्र फडणवीस यांनी स्पष्ट केलं आहे. मात्र मगोपने अद्यापही भाजपला पाठिंबा जाहीर केलेला नाही. तृणमूल काँग्रेससोबत युती असल्यामुळे अभिषेक बॅनर्जी यांच्याशी चर्चा करुनच मग पाठिंब्याचा निर्णय घेणार असल्याचं मगोपच्या (MGP) सुदिन ढवळीकर यांनी याआधीच स्पष्ट केलं आहे. देवेंद्र फडणवीस यांनी भाजपला 20 पेक्षा अधिक जागा मिळतील असा विश्वासही व्यक्त केला आहे. तसंच गोव्यातील जनतेने दाखवलेल्या विश्वासाबद्दल त्यांनी गोमंतकीय जनतेचे आभारही मानले आहेत. पंतप्रधान मोदींच्या नेतृत्त्वाला गोव्याच्या जततेने निवडून दिलं आहे, आता आम्हीच सरकार स्थापन करु असा दावाही त्यांनी केला आहे.