मडगाव: ‘कोण काय बोलतात ते बोलू द्या, पण मी भाजपाशीच प्रामाणिक आहे. माझ्या नशिबात काय आहे ते मला मिळणार, त्यासाठी मी कधी लॉबिंग केलेले नाही’, अशी प्रतिक्रिया उपमुख्यमंत्री बाबू कवळेकर यांनी व्यक्त केली.

बाबू कवळेकर यांना मुख्यमंत्री व्हायचे आहे आणि त्या लालसेपोटीच त्यांनी आपली पत्नी सावित्री कवळेकर यांना सांगेत अपक्ष म्हणून उभे केले, असा आरोप भाजपचे सांगेचे उमेदवार सुभाष फळदेसाई यांनी काल केला होता. या आरोपामुळे भाजप वर्तुळात खळबळ माजली असून त्या पार्श्वभूमीवर कवळेकर यांच्याशी संपर्क साधला असता त्यांनी आपली बाजू मांडली.

कवळेकर म्हणाले, मी कधीही अती महत्वाकांक्षी नव्हतो. आजही नाही. मी कधीही कोणत्या पदाची मागणी केलेली नाही. मला ती पदे देवाच्या कृपेने आपोआप मिळाली आहेत. यापुढेही तसेच होणार याची मला खात्री आहे.

मी काँग्रेसमध्ये असताना त्या पक्षाशी प्रामाणिक होतो. आता मी भाजपात आहे. मी भाजपशी प्रामाणिक आहे. त्यामुळे कोण काय बोलतात त्यावर मला प्रतिक्रिया द्यावी, असे वाटत नाही.