Nepal Dashain: नेपाळमधील जनकपूर शहरात असलेल्या राजदेवी मंदिरात दशैन उत्सवाच्या आठव्या आणि नवव्या दिवशी नेपाळ आणि भारतातील हजारो लोकांनी 15 हजारांहून अधिक बकऱ्यांचा बळी दिला. मंदिराच्या अधिकाऱ्यांनी सोमवारी एका स्थानिक वृत्तपत्राला ही माहिती दिली.

दशैन हा 10 दिवसांचा उत्सव आहे जो संपूर्ण नेपाळमध्ये दुर्गा देवीची पूजा करण्यासाठी साजरा केला जातो आणि विजय दशमी हा उत्सवाचा शेवटचा दिवस आहे. सणाचा आठवा आणि नववा दिवस अष्टमी आणि नवमी म्हणून साजरे केले जातात आणि दोन्ही दिवस समान मानले जातात.

दोन्ही दिवशी लोक प्राण्यांचा बळी देतात. भारतातील अनेक राज्यांमध्ये अशा प्रथांवर बंदी असल्याने, मोठ्या संख्येने भारतीय हिंदू उत्सवादरम्यान नेपाळ मधील मंदिरांमध्ये बलिदान देण्यासाठी जातात.

"सणादरम्यान रविवारी आणि सोमवारी अष्टमी आणि नवमीला देवीच्या मंदिरात एकूण 15,251 बकऱ्यांचा बळी देण्यात आला," असे गुठी संस्थानचे माहिती अधिकारी जनक पोखरेल यांनी वृत्तपत्राला दिली. पोखरेल संपूर्ण नेपाळमधील मंदिरांचे व्यवस्थापन करतात.

बळी दिलेल्या बकऱ्यांपैकी 50 टक्के बकऱ्या भारतीय भाविकांनी आणल्या होत्या. पोखरेल यांनी 'पीटीआय'ला दिलेल्या माहितीनुसार, 'ही एक प्राचीन परंपरा आहे आणि बलिदानासाठी आणलेल्या बकऱ्यांपैकी 50 टक्के बकऱ्या भारतीय भाविक आपल्यासोबत आणतात.'

रविवारी रात्री 08 वाजता बकऱ्यांचा बळी देण्यास सुरुवात झाली, ती सोमवारी पहाटे 04 वाजेपर्यंत सुरू होती, असे त्यांनी सांगितले.