US Israel Iran Military Strike: अमेरिका आणि इराण या दोन्ही देशांमधील लष्करी व राजकीय तणाव आता अत्यंत टोकाच्या भूमिकेवर पोहोचला. इराणसोबत अणुकरार आणि शांतता प्रस्थापित करण्यासाठी अमेरिकेकडून आंतरराष्ट्रीय पातळीवर राजनैतिक प्रयत्न सतत सुरु आहेत, परंतु इराण कोणत्याही अटी मानण्यास तयार नाही.

दुसरीकडे, अमेरिकेचे राष्ट्राध्यक्ष डोनाल्ड ट्रम्प (Donald Trump) हे देखील इराणच्या अटींवर कोणताही करार करण्यास पूर्णपणे तयार नाहीत. या वाढत्या वादाच्या दरम्यान, अत्यंत विश्वासू सूत्रांच्या हवाल्याने एक मोठी आणि धक्कादायक बातमी समोर आली की, पुढील आठवड्यात अमेरिका आणि इस्रायल मिळून इराणवर पुन्हा एकदा मोठा लष्करी हल्ला करु शकतात. या संभाव्य युद्धासाठी दोन्ही देशांच्या सैन्याची तयारी अंतिम टप्प्यात आली असून इराणमधील लक्ष्यांची यादीही तयार करण्यात आली. आता केवळ दोन्ही देशांच्या सरकारांकडून या हल्ल्याची अधिकृत घोषणा होण्याची प्रतीक्षा केली जात आहे.

'सीएनएन' या प्रसिद्ध वृत्तसंस्थेने दिलेल्या अहवालानुसार, या युद्धाच्या पार्श्वभूमीवर इस्रायलचे सैन्य (IDF) आणि अमेरिकेची सेंट्रल कमांड (CENTCOM) यांच्यात अत्यंत गोपनीय आणि आपत्कालीन बैठका पार पडल्या आहेत. या उच्चस्तरीय बैठकीमध्ये इराणवर पुन्हा एकदा एकत्रितपणे हल्ला करण्यावर दोन्ही देशांचे एकमत झाले असून कोणत्या ठिकाणांवर बाँबवर्षाव करायचा, हे देखील निश्चित करण्यात आले. या बैठकीचा संपूर्ण अहवाल आणि अंतिम केलेली लक्ष्यांची यादी राष्ट्राध्यक्ष डोनाल्ड ट्रम्प आणि इस्रायलचे पंतप्रधान बेंजामिन नेतन्याहू यांच्याकडे सुपूर्द करण्यात आली.

खरे तर, इराणवर (Iran) तातडीने लष्करी कारवाई करण्यासाठी इस्रायलने अमेरिकेवर प्रचंड दबाव आणला. याच कारणामुळे इराण आणि अमेरिका यांच्यात 8 एप्रिल रोजी झालेला युद्धविराम आता पूर्णपणे व्हेंटिलेटरवर असून तो कधीही संपुष्टात येऊ शकतो, अशी स्थिती निर्माण झाली आहे. कारण या दरम्यान दोन्ही देशांमध्ये झालेल्या शांतता चर्चेच्या दोन फेऱ्या पूर्णपणे अपयशी ठरल्या आहेत.

अमेरिकेचे राष्ट्राध्यक्ष डोनाल्ड ट्रम्प यांनी स्वतः प्रसारमाध्यमांशी बोलताना स्पष्ट केले की, इराणसोबत शांतता करार करण्याचे अमेरिकेचे सर्व प्रयत्न आता संपले आहेत. पाकिस्तानच्या मध्यस्थीने झालेल्या शांतता चर्चेच्या दोन्ही फेऱ्यांमधून कोणताही सकारात्मक तोडगा निघू शकला नाही. इराण आता शांततेसाठी स्वतःहून पुढाकार घेत नाहीये आणि अमेरिकेलाही आता त्यांच्याकडून कोणतीही अपेक्षा उरलेली नाही. या वादाचे मुख्य कारण म्हणजे इराणला जगातील सर्वात महत्त्वाचा सागरी मार्ग असलेल्या 'होर्मुझच्या सामुद्रधुनीवर' स्वतःचा संपूर्ण सार्वभौम अधिकार हवा आहे.

एवढेच नव्हे तर, इराण या सागरी मार्गासाठी एक नवीन व्यवस्थापन धोरण तयार करुन तिथून जाणाऱ्या आंतरराष्ट्रीय जहाजांकडून कर वसूल करण्याच्या तयारीत आहे. यासोबतच इराण आपला वादग्रस्त अणुकार्यक्रम आणि क्षेपणास्त्र कार्यक्रम पूर्णपणे बंद करण्यास साफ नकार देत आहे. याच हट्टी भूमिकेमुळे दोन्ही देशांमधील वाद विकोपाला गेला.

इस्रायलचा मुख्य संकल्प इराणचे उरलेले अणू प्रकल्प आणि क्षेपणास्त्र यंत्रणा पूर्णपणे उद्ध्वस्त करणे हाच आहे, जेणेकरुन भविष्यात इस्रायलच्या सुरक्षेला कोणताही धोका निर्माण होणार नाही. इस्रायली न्यूज एजन्सी 'कान'च्या सूत्रांनी दिलेल्या माहितीनुसार, आगामी संभाव्य हल्ल्यासाठी इस्रायलनेच इराणमधील महत्त्वाच्या ठिकाणांची यादी तयार केली. या गुप्त यादीमध्ये इराणचे अणुऊर्जा प्रकल्प, क्षेपणास्त्र निर्मिती करणारे कारखाने, प्रमुख लष्करी तळ आणि लष्कराचे मुख्य कमांड सेंटर्स समाविष्ट आहेत.

इस्रायली संरक्षण तज्ज्ञांचे असे मत आहे की, जर या लक्ष्यांवर आताच अचूक मारा करुन त्यांना नष्ट केले नाही, तर इराण पुन्हा एकदा लष्करीदृष्ट्या मजबूत होईल. इराण सध्या आंतरराष्ट्रीय निर्बंधांमुळे कमकुवत स्थितीत आहे, त्यामुळे त्याच्या लष्करी शक्तीला आताच मोडून काढणे जास्त सोपे आणि फायदेशीर ठरेल, अशी रणनीती अमेरिका आणि इस्रायलने आखली आहे.