Iran Missile Attack US Bases Jordan Bahrain: सप्टेंबर महिना सुरु होताच मध्यपूर्वेत पुन्हा एकदा महायुद्धाचे ढग घनदाट झाले असून अमेरिका आणि इराण आमनेसामने आले आहेत. अमेरिकेने सलग दुसऱ्या दिवशी इराणमधील 'इस्लामिक रिव्होल्यूशनरी गार्ड कॉर्प्स' (IRGC) च्या अनेक शहरांमधील तळांवर बॉम्बचा वर्षाव केला. या हल्ल्याला प्रत्युत्तर म्हणून इराणनेही आक्रमक पवित्रा घेत जॉर्डन आणि बहारीनसारख्या अरब देशांमधील अमेरिकेच्या लष्करी तळांवर बॅलिस्टिक क्षेपणास्त्रे आणि ड्रोन डागले.

अमेरिकेचे राष्ट्राध्यक्ष डोनाल्ड ट्रम्प यांनी इराणला (Iran) थेट इशारा देत बदला घेण्याचा प्रयत्न केल्यास याहून अधिक भीषण परिणाम भोगावे लागतील अशी धमकी दिली, तर दुसरीकडे तेहरानने अमेरिकेला या कृत्याचा पश्चात्ताप करावा लागेल असा प्रतिइशारा दिला आहे.

इराणच्या IRGC ने दावा केला की, त्यांनी जॉर्डनच्या प्रिन्स हसन एअर बेसवर लांब पल्ल्याचे RQ-4 आणि MQ-9 ड्रोन असलेल्या हँगरला लक्ष्य करुन क्षेपणास्त्रे डागली. या हल्ल्यात हँगरला भीषण आग लागली आणि अनेक अमेरिकन सैनिक ठार झाल्याचा दावा केला जात आहे, तरीही अमेरिका आणि जॉर्डनने अद्याप जीवितहानीच्या अधिकृत आकडेवारीची पुष्टी केलेली नाही.

तत्पूर्वी, अमेरिकन सेंट्रल कमांडने इराणच्या केश्म बेट, चाबहार बंदर आणि बंदर अब्बास यांसारख्या महत्त्वाच्या भागांवर बॉम्बहल्ला केला होता. सिरिक काउंटीमध्ये क्षेपणास्त्र थेट एका विवाह सोहळ्यावर पडल्याने लहान मुलासह चौघांचा मृत्यू झाला तर 50 हून अधिक नागरिक गंभीर जखमी झाले.

या युद्धाची ठिणगी सोमवारी पडली, जेव्हा इराणने होर्मुझच्या सामुद्रधुनीतून जाणाऱ्या दोन सागरी टँकरवर हल्ला केला. यानंतर भडकलेल्या अमेरिकेने इराणच्या मिसाइल लाँचर्सवर थेट हवाई हल्ला चढवला. सध्या मध्यपूर्वेत 50000 हून अधिक अमेरिकी सैनिक तैनात करण्यात आले असून, परिस्थिती कधीही हाताबाहेर जाण्याची शक्यता निर्माण झाली आहे.