द काश्मीर फाईल्स: देशभरात धुमाकूळ घालणाऱ्या दिग्दर्शक विवेक अग्निहोत्रीच्या 'द काश्मीर फाइल्स' या चित्रपटाने अमेरिकेतही खळबळ उडवली आहे. भारताप्रमाणेच तिथेही चित्रपटगृहांची संख्या चौपट वाढली असुन. या चित्रपटाच्या कमाईने तेथे दाखवल्या जाणाऱ्या सर्व इंग्रजी चित्रपटांना मागे टाकण्यास सुरुवात केली आहे. या आठवड्याच्या शेवटी, चित्रपटाने यूएसए बॉक्स ऑफिसच्या टॉप 10 ट्रेंडिंग चित्रपटांमध्ये प्रवेश केला आहे. ('The Kashmir Files' movie hits top 10 in USA)

'द काश्मीर फाइल्स' (The Kashmir Files) हा चित्रपट 11 मार्चला अमेरिकेतही प्रदर्शित झाला. केवळ 63 चित्रपटगृहांमध्ये सुरू झालेल्या या चित्रपटाने पहिल्या वीकेंडला सुमारे $400,000 कमाई करून प्रेक्षकांना थक्क केले. यानंतर चित्रपट दाखविणाऱ्या चित्रपटगृहांची संख्या वाढू लागली आणि शेवटचे वृत्त मिळेपर्यंत अमेरिकेत (America) 'द काश्मीर फाइल्स' चित्रपट दाखविणाऱ्या चित्रपटगृहांची संख्या रविवारपर्यंत 230 वर गेली आहे. भारतातही हा चित्रपट केवळ 650 स्क्रीन्सवर प्रदर्शित झाला होता आणि आता त्यांची संख्या चार हजारांवर गेली आहे.

विवेक अग्निहोत्री दिग्दर्शित 'द काश्मीर फाइल्स' हा चित्रपट अमेरिकेत स्थायिक झालेले भारतीय पाहत आहेत. यासाठी ऑफिसमध्ये ग्रुप बुकिंगही सुरू आहे आणि त्यामुळेच या चित्रपटाच्या अमेरिकन कलेक्शनमध्ये दिवसेंदिवस वाढ होत आहे. या चित्रपटाने पहिल्याच आठवड्यात सुमारे 10 लाख डॉलर्सचा व्यवसाय केला आहे.

अभिषेक अग्रवाल आर्ट्स आणि झी स्टुडिओज यांच्या संयुक्त विद्यमाने विवेक रंजन अग्निहोत्रीचा 'द काश्मीर फाइल्स' हा चित्रपट काश्मीर (Kashmir) खोऱ्यातील स्थानिक काश्मिरी पंडितांच्या 32 वर्षांपूर्वी झालेल्या हत्याकांडाचे वास्तव उलगडून दाखवतो. अनुपम खेर, मिथुन चक्रवर्ती, पल्लवी जोशी, दर्शन कुमार, प्रकाश बेलवाडी, मृणाल कुलकर्णी आणि चिन्मय मांडलेकर यांसारख्या प्रसिद्ध कलाकारांनी या चित्रपटात काम केले आहे.