सुरिन: थायलंड व कंबोडियामधील सीमेवरील संघर्ष शनिवारी तिसऱ्या दिवशी सुरू होता. दोन्ही देशांमधील हिंसाचारातील मृतांचा आकडा ३२ वर पोचला आहे. थायलंडशी झालेल्या संघर्षात १२ जणांचा मृत्यू झाला. यात दोन्ही बाजूंच्या मृतांची संख्या ३२ झाली.

सीमेवरील हजारो लोकांवर घर सोडण्याची वेळ आली. संयुक्त राष्ट्रांच्या (यूएन) सुरक्षा समितीने रात्री उशिरा न्यूयॉर्कमध्ये बंद दाराआड बैठक घेतली. सुरक्षा समितीने अधिकृत निवेदन जाहीर केले नसले तरी सर्व १५ सदस्य देशांनी तणाव कमी करण्याचे, संयम दाखवण्याचे आवाहन केले आहे.

भारतीय नागरिकांना सूचना

थायलंड आणि कंबोडियामधील संघर्षादरम्यान भारताने देशवासींना सावधानतेचा इशारा दिला आहे. कंबोडियातील भारतीय दूतावासाने आज मार्गदर्शक सूचना जाहीर केल्या. ‘कंबोडिया-थायलंड सीमेवर सुरू असलेल्या संघर्षाच्या पार्श्वभूमीवर भारतीय नागरिकांना सीमा भागात प्रवास करणे टाळण्याचा सल्ला देण्यात येत आहे,’ असे येथील दूतावासाने ‘पोस्ट’मध्ये म्हटले आहे.सावधगिरी बाळगण्याचे आवाहन केले आहे.

५८ हजार लोकांचे स्थलांतर

थायलंडच्या आरोग्य मंत्रालयाने दिलेल्या माहितीनुसार, आतापर्यंत सुमारे ५८ हजार लोकांनी सीमेनजीकच्या गावांमधून स्थलांतर केले आहे. कंबोडियाच्या दाव्यानुसार २३ हजारपेक्षा जास्त लोक सुरक्षित ठिकाणी पोहोचले आहेत.तणावामुळे शाळा, महाविद्यालये बंद आहेत. मंदिराजवळ स्फोट होऊ लागले असून गावांमध्ये ग्रामस्थांनी तंबूत आसरा घेतला आहे.

शस्त्रसंधीचे कंबोडियाचे आवाहन

कंबोडियाने ‘यूएन’च्या माध्यमातून शस्त्रसंधी करण्याचे आवाहन केले आहे. कंबोडियाचे ‘यूएन’मधील राजदूत चेया कियो म्हणाले, की हिंसाचार त्वरित थांबावा, शांततेने हा वाद सुटावा, असे आम्हाला वाटते. मात्र थायलंडने यावर कोणतीही प्रतिक्रिया दिलेली नाही. कंबोडियाने थायलंडवर हल्ला केल्याच्या आरोपांना उत्तर देताना ‘हवाई दल नसलेला एक छोटा देश त्याच्या तिप्पट सैन्यासह खूप मोठ्या देशावर कसा हल्ला करू शकतो?’ असा सवाल केला. दरम्यान, सुरक्षा समितीने दोन्ही बाजूंनी संयम बाळगण्याचे आवाहन केले आहे. थायलंडचे ‘यूएन’मधील राजदूत पत्रकारांशी न बोलता बैठकीतून निघून गेले.