Terrorist Attack: पाकिस्तानमधील दहशतवादी हल्ले थांबण्याचे नाव घेत नाहीत. बलुचिस्तान प्रांतातील जरघून भागात शनिवारी पुन्हा दहशतवाद्यांनी सुरक्षा चौकीवर हल्ला केला.

या दहशतवादी हल्ल्यात पाकिस्तानचे तीन जवान शहीद झाले असून प्रत्युत्तरादाखल एका दहशतवाद्याचाही खात्मा झाला आहे.

पाकिस्तानी लष्कराची मीडिया शाखा इंटर-सर्व्हिसेस पब्लिक रिलेशन्स (ISPR) ने एका निवेदनात म्हटले आहे की, दहशतवाद्यांनी (Terrorists) या भागातील कोळसा खाणींवर खंडणीचे प्रयत्न रोखण्यासाठी उभारण्यात आलेल्या एका चौकीला लक्ष्य केले.

निवेदनानुसार, सुरक्षा दलांनीही गोळीबार करुन प्रत्युत्तर दिले. या चकमकीत तीन जवान शहीद झाले असून एक दहशतवादीही मारला गेल्याचे सांगण्यात येत आहे.

ISPR ने सांगितले की, जरघूनच्या डोंगराळ भागात शोध मोहीम सुरू करण्यात आली आहे. आयएसपीआरचे महासंचालक मेजर जनरल अहमद शरीफ चौधरी यांनी अलीकडेच सांगितले होते की, गेल्या एका वर्षात 436 दहशतवादी हल्ल्यांमध्ये किमान 293 लोक मारले गेले आणि 521 जण जखमी झाले.

दुसरीकडे, या काळात दहशतवादविरोधी कारवायांमध्ये एकूण 137 सुरक्षा जवान शहीद आणि 117 जण जखमी झाल्याची माहितीही त्यांनी दिली होती. गेल्या सहा महिन्यांपासून पाकिस्तानमध्ये (Pakistan) दहशतवादी हल्ले वाढले आहेत.