Taliban News: तालिबानने एका नवीन मौखिक आदेशानुसार काबूल आणि देशभरातील इतर प्रांतांमध्ये महिलांच्या ब्युटी सलूनवर बंदी घातली आहे.

एएनआय या वृत्तसंस्थेनुसार, तालिबानच्या 'प्रिव्हेंटिंग एव्हिल आणि स्प्रेडिंग वर्च्यू' मंत्रालयाचे प्रवक्ते मोहम्मद अकीफ महाजार यांनी टोलो न्यूजला ही माहिती दिली आहे. मंत्रालयाने काबूल नगरपालिकेला नवीन आदेशाची अंमलबजावणी करण्याचे आणि महिला ब्युटी सलूनचे परवाने रद्द करण्याचे आदेश दिले.

'आपण काय केले पाहिजे'

टोलो न्यूजनुसार, मेकअप आर्टिस्ट रेहान मुबारीझ म्हणाल्या की, 'अफगाण पुरुष बेरोजगार आहेत. जेव्हा पुरुष आपल्या कुटुंबाची काळजी घेऊ शकत नाहीत, तेव्हा स्त्रियांना भाकरी कमवण्यासाठी ब्युटी सलूनमध्ये काम करावे लागते. आम्हाला तिथे जाण्यास बंदी घातली तर आम्ही काय करावे?'

मेकअप आर्टिस्ट मुबारिझ पुढे म्हणाल्या की, 'जर (कुटुंबातील) पुरुषांकडे नोकऱ्या असतील तर आम्ही घराबाहेर पडणार नाही. आम्ही उपाशी रहावे का? काय करावे? आम्ही मरावे अशी तुमची इच्छा आहे.'

काबूलचे रहिवासी अब्दुल खबीर म्हणाले की, “सरकारने (Government) यासाठी एक चौकट तयार करावी. चौकट अशी असावी की, ज्यामध्ये इस्लामचे किंवा देशाचे नुकसान होणार नाही.''

तालिबानने महिलांवर कडक निर्बंध लादले

दुसरीकडे, ऑगस्ट 2021 मध्ये अफगाणिस्तानातून यूएस आणि नाटो सैन्याने माघार घेतल्यानंतर, तालिबानने देशातील सत्ता काबीज केली. 1990 च्या दशकातील राजवटीच्या तुलनेत अताचे शासन अधिक उदारमतवादी असेल असे वचन दिले होते.

मात्र, तालिबानने (Taliban) हे आश्वासन पूर्ण न करता महिलांवर निर्बंध लादण्यास सुरुवात केली. इस्लामिक अमिरातीने मुली आणि महिलांना शाळा, विद्यापीठे आणि एनजीओमध्ये काम करण्यास तसेच पार्क, सिनेमा आणि इतर मनोरंजन क्षेत्र यासारख्या सार्वजनिक ठिकाणी भेट देण्यावर बंदी घातली आहे. तालिबानने अफगाण मुली आणि महिलांवर घातलेल्या बंदीवर आंतरराष्ट्रीय स्तरावर टीका होत आहे.