Susan Dell White House Appearance With Donald Trump: डेल टेक्नॉलॉजीजचे संस्थापक मायकल डेल यांची पत्नी सुसान डेल या नुकत्याच अमेरिकेचे राष्ट्राध्यक्ष डोनाल्ड ट्रम्प यांच्या भेटीमुळे चर्चेत आल्या. 7 ऑक्टोबर रोजी झालेल्या या कार्यक्रमात मुलांच्या इन्व्हेस्टमेंट अकाऊंट्ससाठी 6.25 अब्ज डॉलर्सच्या मोठ्या निधीची घोषणा करण्यात आली. मात्र, या सामाजिक उपक्रमापेक्षा सोशल मीडियावर सुसान डेल यांच्या बदललेल्या लूकची आणि चेहऱ्यावरील हावभावांची चांगलीच चर्चा रंगली.

सुसान डेल यांचा जन्म आणि पार्श्वभूमी केवळ तंत्रज्ञान जगतापुरती मर्यादित नाही. त्यांनी फॅशन डिझायनिंग क्षेत्रातही आपले स्वतंत्र अस्तित्व निर्माण केले. 2003 ते 2009 दरम्यान त्यांनी 'फी' नावाचा लक्झरी फॅशन ब्रँड चालवला. तसेच 2001 मध्ये अमेरिकेचे माजी राष्ट्राध्यक्ष जॉर्ज डब्ल्यू. बुश यांच्या मुलींच्या इनॉगरल गाउन्सचे डिझायनिंग त्यांनी केले. 1988 मध्ये ऑस्टिन, टेक्सास येथे त्यांची मायकल डेल यांच्याशी भेट झाली आणि 1989 मध्ये त्यांचे लग्न झाले. या दाम्पत्याने 1999 मध्ये 'मायकल अँड सुसान डेल फाऊंडेशन'ची स्थापना केली, जे प्रामुख्याने मुले आणि कुटुंबांच्या विकासासाठी काम करते. त्यांच्या याच कार्यासाठी 2019 मध्ये त्यांना 'टेक्सास वुमेन्स हॉल ऑफ फेम'मध्ये स्थान देण्यात आले.

व्हाइट हाऊस मधील या कार्यक्रमात 6.25 अब्ज डॉलर्सच्या 'ट्रम्प अकाऊंट्स' कार्यक्रमावरही प्रकाश टाकण्यात आला. या उपक्रमांतर्गत 25 दशलक्ष मुलांना प्रत्येकी 250 डॉलर्सचे योगदान देण्याचे उद्दिष्ट आहे. राष्ट्राध्यक्ष ट्रम्प यांनी त्यांना राजकारणात (Politics) येण्याचे सुचवून पाठिंबा दर्शवला, मात्र सुसान यांनी राजकारणात येण्याबाबत कोणतीही घोषणा केलेली नाही.

दरम्यान, त्यांच्या व्हायरल झालेल्या फोटोंवर नेटकऱ्यांनी विविध प्रतिक्रिया दिल्या आहेत. काहींनी त्यांच्या मेकअप आणि चेहऱ्यामधील बदलांवरुन कॉस्मेटिक प्रक्रियेची चर्चा केली, तर ट्रम्प यांच्या वर्तुळातील लोकांसाठी वापरल्या जाणाऱ्या 'मार-ए-लागो फेस' या शब्दाचाही वापर केला गेला. या सगळ्या चर्चांमुळे सुसान डेल यांच्या चेहऱ्यावरील बदलांविषयी अंदाज बांधले जात असले, तरी त्यांच्या लूकमागील कारणांची कोणतीही अधिकृत पुष्टी झालेली नाही. या निमित्ताने नेहमी पडद्यामागे राहून परोपकारी कार्य करणाऱ्या सुसान डेल पुन्हा एकदा चर्चेच्या केंद्रस्थानी आल्या आहेत.