Human Organ Regeneration Scientific Breakthrough: जर अपघातात एखाद्याला हात किंवा पाय गमवावा लागला, तर तो सरड्याच्या शेपटीसारखा काही दिवसांत पुन्हा नैसर्गिकरित्या येईल का? हे ऐकायला जरी एखाद्या कल्पनेसारखे किंवा निसर्गाच्या नियमांविरुद्ध वाटत असले, तरी शास्त्रज्ञांनी आता हे प्रत्यक्षात आणण्याच्या दिशेने एक अत्यंत मोठे पाऊल उचलले. आतापर्यंत जी गोष्ट पूर्णपणे अशक्य मानली जात होती, ती अमेरिकेच्या टेक्सास ए अँड एम युनिव्हर्सिटीच्या संशोधकांनी खरी करुन दाखवली. शास्त्रज्ञांनी (Scientists) असा एक अद्भूत शोध लावला, जो येणाऱ्या काळात मानवाला आपले गमावलेले अवयव पुन्हा मिळवून देण्याची ताकद देऊ शकतो.

नेचर कम्युनिकेशन्स मासिकात प्रसिद्ध झालेल्या या नवीन संशोधनानुसार, शास्त्रज्ञांनी कोणत्याही बाह्य स्टेम सेल किंवा जेनेटिक इंजिनिअरिंगचा वापर न करता, केवळ दोन नैसर्गिक प्रथिनांच्या मदतीने उंदरांची कापलेली बोटे पुन्हा आणण्यात यश मिळवले. या प्रक्रियेमुळे गंभीररीत्या खराब झालेली हाडे, सांधे आणि लिगामेंट्स पूर्णपणे बरे केले जाऊ शकतील. या संशोधनाचा आणखी एक मोठा फायदा म्हणजे, कोणत्याही मोठ्या शस्त्रक्रियेनंतर किंवा गंभीर दुखापतीनंतर शरीरावर राहणारे मोठे आणि विद्रूप डाग या तंत्रज्ञानामुळे कायमचे नष्ट केले जाऊ शकतात.

आतापर्यंत वैज्ञानिक जगतात कापलेले अवयव पुन्हा कार्यरत करण्यासाठी कृत्रिम प्लॅस्टिक आणि मेटलच्या अवयवांवर किंवा बाह्य स्टेम सेल्सवर अवलंबून राहावे लागत होते. परंतु, या ताज्या शोधामुळे हे सिद्ध झाले की, मानवी शरीराकडे स्वतःला पूर्णपणे बरे करण्याची आणि अवयवांची पुनर्निर्मिती करण्याची नैसर्गिक क्षमता आधीपासूनच आहे, फक्त तिला योग्य उद्दीपनाची गरज असते. वैद्यकीय क्षेत्राचा चेहरामोहरा बदलून टाकणाऱ्या या शोधामुळे भविष्यात मानवी अवयव प्रत्यारोपणाच्या क्षेत्रात एक मोठी क्रांती होण्याची शक्यता निर्माण झाली.