South American Country Peru: जगात ट्रान्सजेंडर, नॉन बायनरी आणि इंटरसेक्स लोकांबद्दल वेगवेगळ्या देशांची वेगवेगळी मते आहेत. जगातील काही देशात त्यांच्या मूलभूत हक्कांचे संरक्षण करण्यात आले, तर काही देशात त्यांचा आवाज दाबण्यात आला. त्यामुळे जगातील अनेक देश त्यांच्या हक्कांबद्दल कोणत्याही प्रकारची भीडभाड न बाळगता बोलतात. दरम्यान, एका देशातून अशी बातमी समोर आली आहे की, जी ऐकून तुम्हीही चकित व्हाल. दक्षिण अमेरिकन देश पेरुने एक मोठा निर्णय घेतला आहे.

न्यूयॉर्क पोस्टच्या रिपोर्टनुसार, पेरु देशाने अधिकृतरित्या ट्रान्सजेंडर, नॉन-बायनरी आणि इंटरसेक्स लोकांना 'मानसिकदृष्ट्या आजारी' म्हणून घोषित केले आहे. त्यांच्यावर मोफत उपचार करण्यात येणार असल्याचेही सांगण्यात आले आहे. पेरुच्या आरोग्य मंत्रालयाने सांगितले की, मानसिक आरोग्यासाठी वैद्यकीय सेवेचे संपूर्ण कव्हरेज देऊन, देशाच्या सार्वजनिक आरोग्य सेवांचा विस्तार करण्यात आला आहे. याची खात्री करण्यासाठी हा निर्णय घेण्यात आला आहे.

LGBTQ+ आउटलेट पिंक न्यूजच्या रिपोर्टनुसार, ट्रान्स आणि इंटरसेक्स लोक मानसिकदृष्ट्या आजारी आहेत हे प्रतिबिंबित करण्यासाठी हा निर्णय आवश्यक आरोग्य विमा योजनेत बदल करेल. आउटलेटच्या रिपोर्टनुसार, आरोग्य मंत्रालयाने शुक्रवारी जारी केलेल्या निवेदनात म्हटले आहे की, हा बदल असूनही ट्रान्स आणि इतर LGBTQ+ लोकांना कन्वर्जन थेरपी घेण्याची सक्ती केली जाणार नाही.

तथापि, देशभरातील LGBTQ+ समूहाच्या कार्यकर्त्यांनी या निर्णयावर टीका केली आहे. त्यांनी म्हटले की, हा निर्णय त्यांच्या हक्क आणि सुरक्षिततेसाठीच्या लढ्याला मागे खेचत आहे. लिमाच्या दक्षिण वैज्ञानिक विद्यापीठातील वैद्यकीय संशोधक पर्सी मायटा-ट्रिस्टन यांनी टेलिग्राफला सांगितले की, या निर्णयामुळे LGBTQ+ समस्यांबद्दल जागरुकता नसलेली दिसून येते. ते पुढे म्हणाले की, 'आपण या गोष्टीकडे दुर्लक्ष करु शकत नाही की हे अत्यंत पुराणमतवादी समाजात घडत आहे, जिथे LGBTQ समुदायाला कोणतेही अधिकार नाहीत. जिथे त्यांना मानसिकदृष्ट्या आजारी घोषित केल्याने कन्वर्जन थेरपीची दारे खुली होतील.'