Pakistan Minister Mohsin Naqvi Car Video: पाकिस्तानच्या नागरिकांवर, मग ते सामान्य नागरिक असोत वा मोठे मंत्री, जगाचा फारसा विश्वास नाही, हे पुन्हा एकदा सिद्ध झाले. या गोष्टीला दुजोरा देणारी एक धक्कादायक घटना समोर आली. पाकिस्तानचे गृहमंत्री मोहसिन नक्वी हे लंडन दौऱ्यावर असताना ब्रिटिश पोलिसांनी त्यांच्या गाडीला थांबवून तिची कसून तपासणी केली.

गृहमंत्री मोहसिन नक्वींच्या कारची तपासणी

ब्रिटिश पोलिसांनी गृहमंत्री मोहसिन नक्वी यांच्या कारला थांबवून तपासणी केली, त्या वेळचा व्हिडिओही समोर आला. व्हिडिओमध्ये स्पष्टपणे दिसत आहे की, ही तपासणी केवळ एक साधी 'नियमित तपासणी' नव्हती. पोलिसांनी नक्वी यांच्या कारची प्रत्येक बाजूने आणि अतिशय बारकाईने तपासणी केली. या घटनेने आंतरराष्ट्रीय स्तरावर पाकिस्तानची प्रतिमा आणि जगातील इतर देश पाकिस्तानी नागरिकांकडे कोणत्या नजरेने पाहतात, हे पुन्हा एकदा स्पष्ट झाले.

नेमकी घटना कधी घडली?

मिळालेल्या माहितीनुसार, ही घटना त्या वेळी घडली जेव्हा मंत्री मोहसिन नक्वी ब्रिटिश अधिकाऱ्यांची भेट घेण्यासाठी ब्रिटनच्या परराष्ट्र मंत्रालयात पोहोचले होते. मोहसिन नक्वी हे फेब्रुवारी 2024 पासून पाकिस्तान क्रिकेट बोर्डाचे (PCB) अध्यक्ष (Chairman) देखील आहेत. त्यांनी जानेवारी 2023 ते फेब्रुवारी 2024 या कालावधीत पंजाबचे कार्यवाहक मुख्यमंत्री म्हणूनही काम पाहिले. याशिवाय, नक्वी हे सिटी मीडिया ग्रुपचे संस्थापक देखील आहेत.

मोहसिन नक्वी यांची ही तपासणी म्हणजे पाकिस्तान्यांसाठी आंतरराष्ट्रीय स्तरावर होणाऱ्या अपमानास्पद घटनांच्या मालिकेतील नवीन कडी आहे. पाकिस्तानातील लोक अनेकदा आपापसातही एकमेकांची खूप फजिती करतात. नुकतेच एका पाकिस्तानी खासदाराने सेनाप्रमुख आसिम मुनीर यांना थेट 'सेल्समन' म्हणून हिणवले होते.

यापूर्वी, याचवर्षी मार्चमध्ये तुर्कमेनिस्तानमध्ये नियुक्त केलेले पाकिस्तानचे राजदूत अहसान वगान यांचाही अमेरिकेत अपमान झाला होता. वगान यांना अमेरिकेत प्रवेश करण्यापासून रोखण्यात आले होते. त्यांना विमानतळावरुनच माघारी पाठवण्यात आले होते. मोहसिन नक्वी यांच्यासारख्या महत्त्वाच्या व्यक्तीची सार्वजनिकरित्या तपासणी होणे, हे आंतरराष्ट्रीय समुदायाकडून पाकिस्तानला (Pakistan) मिळणाऱ्या वागणुकीचे एक स्पष्ट उदाहरण मानले जात आहे.