Pakistan: सिंध प्रांतात राहणाऱ्या 190 हिंदूंना पाकिस्तानी अधिकाऱ्यांनी भारतात जाण्यापासून रोखले आहे. यामागचे कारण असे की, हे लोक कथितरित्या त्यांच्या शेजारी देशाला भेट देण्याच्या उद्देशाबाबत समाधानकारक उत्तरे देऊ शकले नाहीत. मीडिया रिपोर्ट्समध्ये ही माहिती देण्यात आली आहे.

'द एक्स्प्रेस ट्रिब्यून'च्या वृत्तानुसार, सिंधच्या अनेक भागातून मुले आणि महिलांसह विविध हिंदू (Hindu) कुटुंबे मंगळवारी वाघा सीमेवर पोहोचली. त्यांच्याकडे व्हिसा होता आणि त्यांना तीर्थयात्रेसाठी भारतात जायचे होते.

हिंदूंना भारतात जाण्याचे कारण सांगता आले नाही

त्यांना भारतात (India) का जायचे आहे याचे योग्य कारण सांगता न आल्याने पाकिस्तानच्या इमिग्रेशन अधिकाऱ्यांनी त्यांना अडवले. या अहवालात सूत्रांच्या हवाल्याने म्हटले आहे की, हिंदू कुटुंबे अनेकदा धार्मिक यात्रेच्या नावाखाली व्हिसा घेतात आणि नंतर दीर्घकाळ भारतात राहतात. सध्या मोठ्या संख्येने पाकिस्तानी हिंदू राजस्थान आणि दिल्लीत वास्तव्य करत आहेत.

'सेंटर फॉर पीस अँड जस्टिस पाकिस्तान'च्या अहवालानुसार, पाकिस्तानमध्ये अल्पसंख्याक हिंदू समुदायाची लोकसंख्या 22,10,566 आहे, जी देशातील एकूण नोंदणीकृत लोकसंख्येच्या 1.18 टक्के आहे. पाकिस्तानची नोंदणीकृत लोकसंख्या 18,68,90,601 आहे.

दुसरीकडे, पाकिस्तानमधील बहुसंख्य हिंदू लोकसंख्या गरीब आहेत. त्यांना देशाच्या विधिमंडळात शून्य प्रतिनिधित्व आहे. बहुसंख्य हिंदू लोकसंख्या सिंध प्रांतात राहते, जिथे त्यांची संस्कृती, परंपरा आणि भाषा मुस्लिम रहिवाशांशी मिळती जुळती आहे. ते अनेकदा अतिरेक्यांच्या छळाची तक्रारही करतात.